لاہور :پاکستان کے سابق صدر رفیق تارڑ طویل علالت کے بعد 92 برس کی عمر میں انتقال کرگئے۔ رفیق تارڑ کے انتقال کی تصدیق ان کے پوتے اور مسلم لیگ (ن) کے رہنما عطا تارڑ نے ٹوئٹ کے ذریعے کی۔
ڈان سے گفتگو کرتے ہوئے مسلم لیگ (ن) کی رہنما عظمیٰ بخاری نے بتایا کہ رفیق تارڑ عرصہ دراز سے علیل تھے، انہیں سانس، ذیابیطس اور پھیپھڑوں کے امراض سمیت متعدد بیماریاں تھیں۔
سابق صدر کے انتقال پر تعزیت کا اظہار کرتے ہوئے پاکستان مسلم لیگ (ن) کے صدر اور قائد حزب اختلاف شہباز شریف ان کے لیے مغفرت کی دعا کی۔شہباز شریف نے کہا کہ سابق صدر مملکت، ہمارے شفیق اور مہربان بزرگ، زیرک قانون دان، انصاف پسند جج اور نہایت اچھے انسان محترم رفیق تارڑ بھی رخصت ہوگئے، اللہ تعالی ان کے درجات بلند فرمائے۔
شہباز شریف کا کہنا تھا کہ ہمارے لیے وہ ایک قابل احترام بزرگ کا درجہ رکھتے تھے جنہوں نے ہر مرحلے پر نہ صرف ہماری مخلصانہ رہنمائی فرمائی بلکہ اپنی دانش مندی، فہم وفراست اور بردباری سے معاملہ فہمی میں بھی ہمیشہ کلیدی کردار اد ا کیا۔
مسلم لیگ کے صدر کا کہنا تھا کہ ’ان کی وفات ایک ذاتی صدمہ ہے، ان کی کمی ہمیشہ ہر قدم پر محسوس ہوتی رہے گی، اللہ تعالی تمام وابستگان کو صبر جمیل دے‘۔وزیر اعظم عمران خان نے دکھ کا اظہار کرتے ہوئے کہا کہ اللہ تعالیٰ مرحوم کی مغفرت فرمائے اور سوگواران کو صبرِ جمیل عطا کرے۔چیف آف آرمی اسٹاف جنرل قمر جاوید باجوہ نے بھی محمد رفیق تارڑ کے انتقال پر گہرے دکھ کا اظہار کیا۔صدر مملکت عارف علوی نے رفیق تارڑ کے انتقال پر افسوس کا اظہا کرتے ہوئے ان کے لیے مغفرت جبکہ اہل خانہ کے لیے صبر کی دعا کی۔
سابق صدر پاکستان محمد رفیق تارڑ کی نماز جنازہ آج 7 مارچ کو بعد نماز عصر 4بج کر 45 منٹ پر جامعہ اشرفیہ لاہور پر ادا کی جائے گی۔نمازِ جنازہ کے لیے جسدِ خاکی 4 بج کر 15 منٹ پر گھر سے روانہ ہوگا۔
دوسری نماز جنازہ ان کے آبائی علاقے گکھڑ میں بعد نماز عشاء، پرانی عید گاہ، پیر کوٹ روڈ پر 8بج کر30 منٹ پر ادا کی جائے گی۔
رفیق تارڑ 2نومبر 1929 کو منڈی بہاالدین میں پیدا ہوئے تھے، انہوں نے 1951 میں پنجاب لا کالج سے ایل ایل بی کی ڈگری حاصل کی۔
وہ 17 جنوری 1991 سے یکم نومبر 1994 تک سپریم کورٹ کے جج رہے، اس سے قبل 6مارچ 1989 سے 31 اکتوبر 1991 تک لاہور ہائی کورٹ کے چیف جسٹس طور پر خدمات بھی انجام دیں۔بعد ازاں رفیق تارڑ نے پاکستان مسلم لیگ (ن) میں شمولیت اختیار کرلی تھی، ان کی بہو سائرہ افضل تارڑ بھی مسلم لیگ (ن) رہنما ہیں۔
مرحوم یکم جنوری 1998 سے 20 جون 2001 تک پاکستان کے 9ویں صدرمملکت کے عہدے پر فائز رہے۔
( بشکریہ : ڈان نیوز )
رفیق تارڑ پرویز مشرف کے ساتھ