کراچی : پاکستان کی سابق وزیر خزانہ اور سابقہ گورنر سٹیٹ بینک ڈاکٹر شمشاد اختر آج (سنیچر کے روز) وفات پا گئی ہیں۔
پاکستان سٹاک ایکسچینج کے ترجمان نے ان کی موت کی تصدیق کرتے ہوئے بتایا کہ شمشاد اختر پاکستان سٹاک ایکسچینج ایس ایس جی سی کی چیئر پرسن تھیں۔
ڈاکٹر شمشاد اختر سٹیٹ بینک کی پہلی خاتون گورنر رہیں، اس کے علاوہ انھوں نے موجودہ حکومت سے پہلے نگران وفاقی حکومت میں بطور وفاقی وزیر خزانہ بھی کام کیا۔
پی ایس ایکس کی ویب سائٹ پر موجود ان کے پروفائل کے مطابق ڈاکٹر شمشاد اختر نے ہارورڈ یونیورسٹی سے فل برائٹ سکالرشپ کے تحت پوسٹ ڈاکٹریٹ مکمل کی۔
23 مارچ 2024 کو انھیں پاکستان کے اعلیٰ ترین سول اعزاز نشانِ امتیاز سے نوازا گیا۔
اپنی موت سے قبل وہ پاکستان میں متعدد اداروں کے بورڈز کی چیئر پرسن کے طور پر خدمات انجام دے رہی تھیں جن میں پاکستان سٹاک ایکسچینج لمیٹڈ، سوئی سدرن گیس ٹرانسمیشن اینڈ ڈسٹری بیوشن کمپنی کا بورڈ، پاکستان انسٹیٹیوٹ آف کارپوریٹ گورننس شامل ہیں۔
وہ پاکستان انوائرنمنٹ ٹرسٹ فنڈ کی مشیر بھی رہیں جبکہ کراچی گرامر سکول اور نیشنل یونیورسٹی آف میڈیکل سائنسز کے بورڈ آف گورنرز کی رکن بھی تھیں۔
( بشکریہ : بی بی سی )