ڈالرز کا لالچ ،آسٹریلوی کرکٹرز ویرات کوہلی کی خوشامد میں مگن۔۔عمران عثمانی

کرکٹ میں بھارت کی طاقت اور وہاں سے ملنے والی بڑی رقم نے آسٹریلیا سمیت تمام ممالک کے کرکٹرز کو خود غرض ،لالچی اور ڈرپوک بنادیا ہے اور اس میں آسٹریلیا کے کرکٹرز پیش پیش ہیں اور ویرا ت کوہلی کی ذلت آمیز انداز میں تعریف کرتے ہیں.
اس بات کا انکشاف کسی عام شخص یا کرکٹر نے نہیں بلکہ آسٹریلیا کے صف اول کے کپتان مائیکل کلارک نے کھل کر ایک ٹی وی پروگرام میں کردیا ہے.
ورلڈ کپ 2015 کے فاتح کپتان کلارک کہتے ہیں کہ انٹرنیشنل کرکٹ میں بھارت کی طاقت ہے سب ڈرتے ہیں اور اسکی ڈومیسٹک کرکٹ میں بھر پور لالچ و طاقت ہے کہ اس کی آئی پی ایل دنیا کی مہنگی ترین لیگ ہے. آسٹریلیا کے کرکٹرز اپنے ملین ڈالرز کے معاہدوں کے بچائو کے لئے بھارتی کپتان اور انکے ہر کھلاڑی کے سامنے شرمناک انداز میں خوشامد کرتے ہیں. 6 ہفتوں کا اگر ایک ملین ڈالرز مل رہا ہو تو کون کوہلی یا اس کے ساتھی کے خلاف زبان کھولے گا .کوہلی اور روہت شرما جیسے سینئرز ہی آئی پی ایل میں کپتان ہوتے ہیں. پھر خلاف بولنے والا ڈریسنگ روم میں کیسے محفوظ ہوگا.
انہوں نے کہا کہ میں کوہلی کے خلاف نہیں ہوں. وہ مجھے بنگلور کے لئے ایک ملین ڈالرز میں منتخب کریں میں ان کے ساتھ کھیلوں گا. یہ رویہ شرمناک اور کرکٹ آسٹریلیا کے لئے ایک عشرے سے ذلت آمیز ہے. آپس کی ملکی سیریز پر اس کے اثرات بھی پڑتے ہیں.
آسٹریلیا کے لئے 2000 میں ڈیبیو کرنے والے مائیکل کلارک نے 15 سالہ کیریئر میں کئی ساتھی و مخالف لیجنڈری کرکٹرز دیکھے .ان میں سے انہوں نے جن 7 کو بہترین بیٹسمین تسلیم کیا ان میں ویرا ت کوہلی بھی شامل ہیں. دیگر کھلاڑیوں میں برائن لارا،سچن ٹنڈولکر،اے بی ڈی ویلیئرز، جاک کیلس، رکی پونٹنگ اور کمار سنگا کارا شامل ہیں. رائٹ ہینڈ بیٹسمین نے 115 ٹیسٹ اور 245 ون ڈے میچز میں اپنے ملک کی نمائندگی کی اور 50 کے قریب کی اوسط سے 8643ٹیسٹ اور 45 کی لگ بھگ اوسط سے 7981 ون ڈے رنز بنارکھے ہیں.