برادرم مجاہد صاحب کے ساتھ میرا رابطہ گردوپیش کے اجراء کے موقع پر ہوا اور یہ سال 2016 کا تھا ۔ پانچ دسمبر کو جب اس ویب سائیٹ کا افتتاح ہوا تو میں نے پہلے روز جن قلمی معاونین سے رابطہ کیا ان میں سید مجاہد علی بھی شامل تھے ۔ مجاہد صاحب کو میں ان دنوں ” ہم سب “ پر پڑھتا تھا بلکہ خود بھی میں اس زمانے میں ہم سب پر ہی بلاگ لکھتا تھا ۔ برادرم وجاہت مسعود کے ذریعے جب میں نے مجاہد صاحب سے رابطہ کیا تو مجھے معلوم نہیں تھا کہ میں ناروے میں مقیم ایک ملتانی کی جانب دوستی کا ہاتھ بڑھا رہا ہوں۔ پھر محبت اور رفاقت کے ایسے سفر کا آغاز ہوا جو آج بھی جاری ہے ۔۔۔
مجاہد صاحب جب بھی ملتان آئیں ملتانیوں سے ضرور رابطہ کرتے ہیں ۔ اس مرتبہ بھی انہوں نے ملتان آنے سے کئی روز پہلے فون کیا اور بتایا کہ وہ ملتان میں کچھ دوستوں سے ملنا چاہتے ہیں لیکن مختصر وقت میں اگر ایک ہی جگہ سب کو مدعو کر لیا جائے تو زیادہ بہتر ہو گا ۔ نو مئی کو مجاہد صاحب کی دعوت پر سب دوست زینجبار میں جمع ہوئے ۔ ڈاکٹر انوار احمد ، سید مجاہد علی ، مجاہد صاحب کے بھائی سید اعجاز علی ،برادرم شاہد راحیل خان ، شاکر حسین شاکر ، جمشید رضوانی ، محمد مختار علی ، ناصر ظہیر بیورو چیف آج ٹی وی ، پبلک پوائنٹ کے روح رواں اور سینئر صحافی ہارون انجم کے علاوہ رابطہ کار رضی الدین رضی اس محفل میں شریک تھے ۔
پر تکلف ظہرانے کے بعد جب کچھ دوست نو مئی کے واقعات پر بحث کی کوشش کر رہے تھے تو میں نے یاد دلایا کہ عہد ضیاع میں بعض ہوٹل والوں نے جلی حروف میں لکھا ہوتا تھا کہ یہاں سیاسی بحث اور نشہ کرنے کی اجازت نہیں ۔کسی نے لقمہ دیا کہ نشئی کا ذکر تو کر لینے دیں آپ نے تو مارشل لاء ہی لگا دیا ۔
