کورونا وائرس : وائس چانسلر نشتر میڈیکل یونیورسٹی مصطفیٰ کمال پاشا زندگی کی بازی ہار گئے

ملتان: نشتر میڈیکل یونیورسٹی کے وائس چانسلرپروفیسر ڈاکٹرمصطفیٰ کمال پاشا بدھ کی صبح کورونا کے باعث انتقال کر گئے۔ان کی عمر 61برس تھی۔ ڈاکٹر مصطفیٰ کمال پاشا 6 جولائی سے وینٹی لیٹر پر تھے۔ ڈاکٹر مصطفیٰ کمال پاشا گزشتہ تین ہفتوں سے کورونا کا شکارتھے ۔ ابتدائی طورپر انہوں نے گھر میں تنہائی اختیار کی ۔ تاہم حالت بگڑنے کے بعد انہیں نجی ہسپتال میں منتقل کردیاگیا۔4جولائی کو انہیں ناک سے خون بہنے پر وینٹی لیٹر پر منتقل کر دیا گیا تھا۔ ان کے علاج کے لیے ان کے دیرینہ دوست کنگ ایڈورڈمیڈیکل یونیورسٹی کے وائس چانسلرپروفیسر ڈاکٹرخالدمسعودگوندل نے لاہور سے ڈاکٹر سلمان ایاز کی قیادت میں ڈاکٹروں کی ٹیم بھی ملتان بھیجی تھی ۔
بعدازاں ملتان انسٹیٹیوٹ آف کارڈیالوجی کے ڈائریکٹرپروفیسرڈاکٹررانا الطاف انہیں نجی ہسپتال سے کارڈیالوجی ہسپتال لے آئے جہاں انہیں ایکمومشین کے ذریعے آکسیجن دینے کی کوشش کی گئی تاہم وہ جانبرنہ ہوسکے۔ڈاکٹر مصطفی کمال پاشا سابق ایم ایس اور پرنسپل نشترمیڈیکل کالج ڈاکٹر کمال کے صاحبزادے تھے۔انہوں نے نشترکالج سے ایم بی بی ایس کیا اور بعدازاں یہیں تدریس کے ساتھ منسلک ہوئے۔وہ ایک ماہر سرجن تھے۔ ان کے شاگردوں کی بڑی تعداد دنیا بھر میں فرائض انجام دے رہی ہے۔ان کے پسماندگان میں اہلیہ، دوبیٹے اور دوبیٹیاں شامل ہیں۔ان کی نماز جناز ہ بدھ کے روز بعد نماز عصر نشترمیڈیکل یونیورسٹی کے گراؤنڈ میں ادا کی جائے گی۔