ملتان ۔۔گردو پیش رپورٹ ( رضی الدین رضی سے ) نام ور آرٹسٹ ، اور ملتان آرٹس کونسل کے سابق ریذیڈنٹ ڈائریکٹر محمد علی واسطی شدید علیل ہیں ۔ ملتان ٹی ہاؤس کے نگران ارشد بخاری صاحب نے تصدیق کی ہے کہ واسطی صاحب کینسر کا شکارہیں ۔ واسطی صاحب کی علالت کی خبر نے ان کے دوستوں اور فنون لطیفہ سے وابستہ شخصیات کو تشویش کا شکار کر دیا اور ان کی صحت یابی کے لیے دعائیں کی جا رہی ہیں ۔
محمد علی واسطی صاحب کی عمر 74 برس ہے انہوں نے ملتان آرٹس کونسل میں کئی یاد گار تقریبات کرائیں ۔ پندرہ برس قبل یہاں ادبی بیٹھک کا قیام بھی انہی کی کاوشوں سے عمل میں آیا ۔ 12 فروری2010 ء کو بیٹھک کا تاسیسی اجلاس منعقد ہوا تو واسطی صاحب اس میں خود بھی موجود تھے ۔۔
ملتان آرٹس کونسل کے سربراہ کی حیثیت سے انہوں نے جو خدمات انجام دیں وہ ناقابل فراموش ہیں ۔وہ1981 ء میں ملتان آرٹس کونسل سے منسلک ہوئے اور 2011 ء میں ریٹائر ہو گئے ۔ ملتان میں آرٹ بازار کا قیام بھی ان کی ذاتی کوششوں کے باعث عمل میں آیا تھا ۔ ریٹائرمنٹ کے بعد بھی وہ ایوان صنعت و تجارت کے پلیٹ فارم سے آرٹ کے لئے خدمات انجام دیتے رہے ۔ہم ان کی صحت اور سلامتی کے لئے دعا گوہیں ۔