لاہور :پاکستان سپر لیگ میں کراچی کنگز نے اپنے قلعے میں مورچے لگا کر مہمان ٹیم لاہور قلندر ز کا بھرکس نکال دیا.10 وکٹ کی باوقار کامیابی سے اس کے پلے آف کھیلنے کے امکانات روشن ہوگئے ہیں جبکہ کوئٹہ گلیڈی ایٹرز نے بھی لاہور کی شکست کے ساتھ دیگر نتائج پر اپنی نگاہیں مرکوز کر لی ہیں۔ کراچی کنگز نے لاہور قلندرز کا حساب بھی برابر کردیا ہے اور نیشنل اسٹیڈیم کراچی میں 10وکٹوں سے کامیابی حاصل کی،قذافی اسٹیڈیم لاہور میں کھیلے گئے میچ میں لاہور قلندرز نے 8 وکٹوں سے کامیابی حاصل کی تھی۔
26ویں میچ میں کراچی کنگز نے 151 رنز کا ہدف 17گیندیں قبل بغیر کسی نقصان کے حاصل کرلیا۔ مہمان کپتان سہیل اختر اور تجربہ کار آلراؤنڈر محمد حفیظ کے علاوہ لاہور قلندرزکا کوئی بلے باز بھی زیادہ دیر وکٹ پر نہ ٹھہر سکا۔ سہیل اختر نے 68 رنز کی انفرادی اننگز کے دوران فخر زمان اور کرس لیِن کے ہمراہ بالترتیب 49 اور 23 رنز کی شراکت قائم کی۔ فخرزمان 17 اور کرس لیِن 5 رنز بناکر آؤٹ ہوئے. بین ڈنک متاثر کن کارکردگی کا مظاہرہ نہ کرسکے۔ وہ 9 رنز بنا کر عمید آصف کا شکار بنے۔ محمد حفیظ نے 35 رنز کی ناقابل شکست اننگز کھیل کر ٹیم کا مجموعہ 150 تک پہنچایا۔ لاہو ر قلندرز نے مقررہ بیس اوورز میں 5 وکٹوں کے نقصان پر 150 رنز بنائے۔ کراچی کنگز کے ارشد اقبال اور عمید آصف نے 2،2 جبکہ کرس جارڈن نے ایک وکٹ حاصل کی۔مطلوبہ ہدف کے تعاقب میں کراچی کنگز کے اوپنرز شرجیل خان اور بابراعظم نے ہوم گراؤنڈ کے چاروں اطراف دلکش اسٹروکس کھیلے۔ اس دوران لاہور قلندرز کے کھلاڑیوں نے ناقص فیلڈنگ کا مظاہرہ کرتے ہوئے شرجیل خان کے دو کیچز بھی چھوڑے۔ دونوں کے درمیان 151 رنز کی ناقابل شکست شراکت قائم ہوئی۔
یہ پی ایس ایل کی تاریخ کی چوتھی سب سے طویل پارٹنرشپ ہے۔ شرجیل خان نے 59 گیندوں پر 74 رنز کی ناقابل شکست اننگز کھیلی۔ ان کی اننگز میں 5 چوکے اور 5 چھکے شامل تھے۔ بابراعظم 46 گیندوں پر 69 رنز بناکر ناٹ آؤٹ رہے۔ بابراعظم وہ واحد بلے باز ہیں جو اب تک لیگ میں 12 نصف سنچریاں بناچکے ہیں۔ کراچی کنگز نے مطلوبہ ہدف17.1 اوورز میں بغیر کسی وکٹ کے نقصان پر حاصل کرلیا۔ کامیابی کے بعد کراچی کنگز کی ٹیم 9 پوائنٹس کے ساتھ پوائنٹس ٹیبل پر پانچویں سے دوسری پوزیشن پر پہنچ گئی ہے۔ لاہور قلندرز کی ٹیم 7 پوائنٹس کے ساتھ ٹیبل پر تیسری سے چوتھی پوزیشن پر آگئی ہے۔
شرجیل خان کو مین آف دی میچ قرار دیا گیا۔13 مارچ جمعہ کو پشاور زلمی اور ملتان سلطانز کی ٹیمیں رات 8 بجے نیشنل اسٹیڈیم کراچی میں مدمقابل آئیں گی۔
