ملتان:ڈویژنل ڈائریکٹرسوشل ویلفیئر وبیت المال ملتان سحر صدیقہ نے منگل کے روز میڈیاسے بات چیت کرتے ہوئے کہاکہ حکومت پنجاب کے ویژن کے مطابق ہماراادارہ معذور افراد کی بحالی اورخوشحالی کے لئے کوشاں ہے ۔اس سلسلے میں محکمہ سوشل ویلفیئر وبیت المال بہت جلد ہمت کارڈ کااجراءکرنے جارہاہے ۔ہمت کارڈ سے ایسے خصوصی افراد جوکام کرنے کی صلاحیت نہیں رکھتے ان کو وظائف اورعلاج معالجہ کی سہولیات مفت مہیاکی جائیں گی ۔انہوں نے کہاکہ ہمارے افسران خصوصی افرادکی رجسٹریشن کے لئے گھر گھر جاکر معذور افرادکورجسٹرڈ کررہے ہیں ۔میڈیکل بورڈ کی منظوری کے بعد معذور یاخصوصی افراد کوسرٹیفکیٹ جاری کردیاجاتاہے ۔انہوں نے بتایاکہ خصوصی افراد گھر بیٹھ کر بھی آن لائن خود کورجسٹرڈ کرواسکتے ہیں ۔صوبائی انتظامیہ ،سیکرٹری اورڈی جی سوشل ویلفیئر کی سربراہی میں خصوصی افراد کی زندگی کو بہتر بنانے کے لئے ہرضلع وتحصیل کی سطح پرضلعی سہولت سنٹر(برائے خصوصی افراد )بنائے گئے ہیں تاکہ ایسے افراد کو کسی بھی مشکل کاسامنا نہ کرناپڑے ۔ڈویژنل ڈائریکٹرنے مزید کہاکہ ملتان میں اب تک 25ہزار کے قریب معذور افراد کو سرٹیفکیٹ جاری کئے جاچکے ہیں ۔معذور افراد ہمارے معاشرے کاحصہ ہیں اورہمارا ادارہ ایسے افراد کی ہرممکن مدد کرتاہے ۔ڈپٹی ڈائریکٹرسوشل ویلفیئر وبیت المال عبدالعزیز خان نے اس موقع پر گفتگوکرتے ہوئے کہاکہ معذور افرادکی سرکاری اورنجی ملازمت کے لئے ہمار ا دارہ متحرک ہے اورایسے افراد کو 3فیصد کوٹہ اورعمر میں 15سال تک کی رعایت میسر ہے ۔ڈپٹی ڈائریکٹرنے بتایاکہ خصوصی افرادکے لئے مسافرٹرینوں اوربسوں میں رعایتی کارڈ کابھی اجراءکیاجاتاہے جس سے وہ باآسانی سفر کرسکتے ہیں ۔
