پاکستان نے امریکی محکمہ خارجہ کی جانب سے جاری کردہ بین الاقوامی مذہبی آزادی کی رپورٹ میں پاکستان کے بارے میں کیے گئے بے بنیاد دعووں کو دوٹوک الفاظ میں مسترد کردیا۔
ترجمان دفتر خارجہ ممتاز زہرا بلوچ نے ہفتہ وار بریفنگ میں کہا کہ پاکستان کا آئین، تمام پاکستانیوں کے حقوق اور آزادیوں کے تحفظ اور ان کے عقیدے سے قطع نظر ان کو آگے بڑھانے کے لیے وسیع پیمانے پر قانونی، پالیسی اور مثبت اقدامات کے لیے ایک مضبوط فریم ورک متعین کرتا ہے۔
انہوں نے کہا کہ پاکستان، اقوام متحدہ کے خصوصی نمائندے برائے اقلیتی امور ڈاکٹر فرنینڈ ڈی ویرنس کے بھارتی غیر قانونی طور پر مقبوضہ جموں و کشمیر کی صورتحال پر دیے گئے اہم بیان کا خیر مقدم کرتا ہے۔
ان کا کہنا تھا کہ بھارت ایک ایسے وقت میں سری نگرمیں جی-20 ٹورزم ورکنگ گروپ کے اجلاس کے انعقاد کر رہا ہے جب مقبوضہ کشمیر میں انسانی حقوق کی بڑے پیمانے پر خلاف ورزیاں، غیر قانونی اور من مانی گرفتاریاں، سیاسی ظلم و ستم، پابندیاں اور یہاں تک کہ آزاد میڈیا اور انسانی حقوق کے محافظوں کو دبانے کا سلسلہ جاری ہے۔
ترجمان دفتر خارجہ نے کہا کہ وزیر خارجہ بلاول بھٹو زرداری نے 11 مئی کو کُل جماعتی حریت کانفرنس کے آزاد جموں و کشمیر چیپٹر کے ایک وفد کے ساتھ ملاقات میں ایسے ہی جذبات کا اظہار کیا، انہوں نے کشمیری عوام کی ان کے موروثی حق خودارادیت کی منصفانہ جدوجہد کی پاکستان کی اخلاقی، سیاسی اور سفارتی حمایت جاری رکھنے کا اعادہ کیا۔
ترجمان کے مطابق انہوں نے اس بات پر بھی زور دیا کہ جموں و کشمیر کے تنازع کو اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق حل کیا جانا چاہیے۔
ان کا کہنا تھا کہ اے پی ایچ سی کے اے جے کے چیپٹر کے ساتھ وزیر خارجہ کی ملاقات ایک ایسے وقت میں ہوئی جب بھارت کے غیر قانونی طور پر مقبوضہ جموں و کشمیر میں آزادی کی حامی سیاسی قیادت بدستور قید ہے۔
ممتاز زہرا بلوچ نے مزید کہا کہ وزیر اعظم شہباز شریف آج پاکستان۔ایران سرحد پر ہیں جہاں وہ اسلامی جمہوریہ ایران کے صدر سید ابراہیم رئیسی سے ملاقات کریں گے، اپنی ملاقات میں دونوں رہنما دوطرفہ تعلقات کے تمام پہلوؤں پر تبادلہ خیال کریں گے اور پاکستان ایران تعلقات کو مزید مضبوط بنانے کے لیے تعاون کے نئے شعبوں کی تلاش کریں گے۔
انہوں نے بتایا کہ سعودی عرب کے نائب وزیر داخلہ ڈاکٹر ناصر بن عبدالعزیز الداؤد نے گزشتہ ہفتے پاکستان کا دورہ کیا، انہوں نے وزیر اعظم، وزیر داخلہ اور وزیر برائے انسداد منشیات سے ملاقات کی۔
اس دورے کے دوران دونوں فریقین نے روڈ ٹو مکہ پروجیکٹ کے معاہدے پر بھی دستخط کیے۔
ترجمان کا مزید کہنا تھا کہ پاکستان، سائبر ایکسپرٹائز کے عالمی فورم (جی ایف سی ای) میں 107ویں رکن کے طور پر شامل ہو گیا ہے، ہمیں اپنے مذہبی تنوع اور تکثیری سماجی تانے بانے پر فخر ہے۔
ممتاز زہرا بلوچ نے کہا کہ پاکستان غزہ اور دیگر مقبوضہ فلسطینی علاقوں میں ہونے والی پیش رفت پر گہری نظر رکھے ہوئے ہے، پاکستان فلسطینی کاز کے لیے اپنی غیر متزلزل حمایت کا اعادہ کرتا ہے اور ایک قابل عمل، خود مختار اور متصل فلسطینی ریاست کے لیے اپنے مطالبے کی تجدید کرتا ہے، مسئلہ فلسطین کا اقوام متحدہ اور او آئی سی کی متعلقہ قراردادوں کے مطابق حل ناگزیر ہے۔
(بشکریہ:ڈان نیوز)
