ایک ماہ کے دوران پنجاب میں 32 ہزار ٹریفک حادثات کا نیا ریکارڈ : ناصر محمود شیخ کا اختصاریہ

آج پھر جینے کی تمنا ہے۔۔ آج پھر مرنے کا ارادہ ہے۔ 13 سیکنڈ میں موت کے تکلیف دہ منظر کی یہ ویڈیو وائیرل ہوئی تو علم ہوا کہ کسی ماں کے خواب کیسے بکھرے ۔۔ جن اموات کی ویڈیوز وائیرل نہیں ہوتیں یا نہیں بنتیں ان کی تعداد کتنی ہے اس بارے میں کچھ نہیں کہا جا سکتا ۔
جولائی 2021پنجاب کو ٹریفک حادثات کے نتیجے میں غموں اور دکھوں کے انبار دے گیا ۔ حادثات اور اموات کا نیا ریکارڈ بن گیا۔۔ ریسکیو 1122 کے ریکارڈ کے مطابق انکی گاڑیاں اور موٹرسائیکلیں اس ماہ کے دوران 32551 ٹریفک حادثات کی اطلاع پر روانہ ہوئیں 35626 زخمیوں کو ہسپتال پہنچایا۔۔ 498 لاشوں کو گھر والوں کے سپرد کیا سب سے زیادہ حادثات لاہور میں ہوئے جہاں وسائل کا انبار ہے ۔ وہاں 150 افراد کی زندگی کے سفر کا اختتام سڑکوں پر ہوا . . ڈیرہ غازیخان میں 37 فیصل آباد میں 25 اوکاڑا میں 23 اور ٹوبہ ٹیک سنگھ میں‌ 14 شہری لاشیں بن گئے۔۔ یہ جدائی کتنی عجیب تھی کہ جانے والے کو اہلہ خانہ الوداع بھی نہ سکے ۔ وہ اب تک سکتے کی کیفیت میں ہونگے۔
اگر موٹر سائیکل سواروں کے 27758 اور رکشہ ڈرائیورز کے 3910 حادثات نکال دیں تو صورتحال کنٹرول میں لگتی ہے کم عمر ڈرائیورز کے 1176 حادثات بھی بڑی تعداد نہیں اگر شدید زخمی ہڈیاں پسلیاں تڑواکر جیتے جی مرنے والوں کی تعداد دیکھیں تو 900 سے زیادہ ہے ۔
آج اتوار یکم اگست ہے شام تک پنجاب میں 12 لاشیں ٹریفک حادثات کی وجہ سے 1122 والوں کے کندھوں پر گھروں کو آئیں گی خدارا ڈرائیونگ میں احتیاط کرلیں. حکومت اور اداروں نے کچھ نہیں کرنا اپنا خیال خود رکھیں