کراچی : تین مرتبہ صدارتی ایوارڈ حاصل کرنے والے پاکستانی شاعر سید نقاش کاظمی کو گزشتہ شب سپرد خاک کر دیا گیا ۔ وہ 77 سال کی عمر میں 31 جولائی 2021 کو کراچی میں انتقال کر گئے تھے ۔
اعلی ادبی خدمات کے باعث انہیں 3 بار صدارتی ایوارڈ سے نوازا گیا پہلا ایوارڈ صدر غلام اسحاق خان نے دوسرا ایوارڈ صدر فاروق احمد خان لغاری نے اور تیسرا ایوارڈ صدر آصف علی زرداری نے عطا کیا ۔ اس کے علاوہ ملک و بیرون ممالک سے بھی انہیں کئی ادبی ایوارڈز سے نوازا گیا ۔ نقاش کاظمی 8 جولائی 1943 ء میں برطانوی ہندوستان کے شہر جونپور میں پیدا ہوئے ۔ان کے والد سید فصیح اللہ کاظمی اردو اور فارسی زبان کے نامور شاعر تھے ۔ پاکستان کے قیام کے بعد وہ اپنے والدین کے ہمراہ ہندوستان سے ہجرت کر کے کراچی پاکستان منتقل ہو گئے ۔ نقاش کاظمی نے کراچی میں ماسٹرز کی ڈگری حاصل کرنے کے بعد پہلے پی ٹی سی ایل( پاکستان ٹیلی کمیونیکیشن لمیٹڈ ) میں بحیثیت انجنیئر جوائن کیا ڈویژنل انجنیئر کے عہدے پر ترقی کے بعد تعلیم کے شعبے سے وابستہ ہو گئے اور کراچی کے مختلف کالجوں میں بحیثیت پروفیسر اپنے فرائض سرانجام دیے ۔ وہ آرٹس کونسل کراچی و دیگر ادبی اداروں سے بھی وابستہ رہے ۔ 14 دسمبر 1972 کو انہوں نے گلزار فاطمہ سے شادی کی جس سے انہیں 3 بچے پیدا ہوئے ۔ وہ 3 نثری کتابوں، دامن گل، رنگ سفر اور ” میراث ” کے مصنف تھے جبکہ ” چاندنی اور سمندر ” اور ”رخ سیلاب “ کے نام سے ان کے دو شعری مجموعے شائع ہوئے ۔
