نام ور افسانہ نگار ، ڈرامہ نگار اور اداکار ڈاکٹر انور سجاد انتقال کر گئے

لاہور : نام ور افسانہ نگار ، ڈرامہ نگار اور اداکار ڈاکٹر انور سجاد طویل علالت کے بعد لاہور میں انتقال کر گئے ۔ ان کی عمر 84 برس تھی ۔ ڈاکٹر انور سجاد 27 مئی 1935ء کو لاہور میں پیدا ہوئے۔ ان کا اصل نام سیّد محمد سجاد انور علی بخاری ہے۔ انہوں نے کنگ ایڈورڈ میڈیکل کالج لاہور سے ایم بی بی ایس کیا۔ پھر ڈی ٹی ایم اینڈ ایچ کا امتحان لندن سے پاس کیا۔انور سجاد کی شخصیت پہلو دار تھی ۔ وہ پیشے کے اعتبار سے میڈیکل ڈاکٹر تھے ۔ نظریاتی وابستگی انہیں سیاست تک لے آئی۔ اسٹیج، ٹیلی وژن کی قوتِ اظہار سے واقف تھے چنانچہ ڈراما نویسی بھی کی اور کامیاب اداکار بھی رہے ۔

سیاسی اور معاشی ناہمواری ان کے موضوع خاص رہے ۔ ڈاکٹر انور سجاد کا پہلا ناولٹ رگ سنگ 1955ء میں شائع ہوا۔ دیگر کتابوں میں استعارے 1970ء، آج، پہلی کہانیاں ، چوراہا، خوشیوں کا باغ اور دیگر شامل ہیں۔ڈاکٹر انور سجاد کو 1989ء میں حکومت پاکستان کی طرف سے صدارتی تمغہ برائے حسن کارکردگی سے نوازا گیا۔