ملتان : نام ور خطاط اور مصور علی اعجاز نظامی طویل علالت کے بعد آٹھ مارچ جمعہ کی شام انتقال کر گئے ۔ علی اعجاز نظامی کی عمر 66 برس تھی ۔ وہ 13 اگست 1952ء کو پیدا ہوئے ۔۔علی اعجاز نظامی نے آرٹ ایڈیٹر کی حیثیت سے مختلف اخبارات میں بھی کام کیا اور پین ورک میں ان کے ڈیزائن کئے ہوئے خاص ایڈیشن بہت مقبول ہوئے ۔ وہ پین ورک اور آئل پینٹنگ سمیت مصوری کے تمام رموز پر مہارت رکھتے تھے ۔ انہوں نے قرانی خطاطی کے علاوہ اسمائے ربانی اور اسمائے محمد کی بھی منفرد انداز میں مصورانہ خطاطی کی ۔ملتان کی عمارتوں اور گلی کوچوں کی تصاویر پر مشتمل ایک سیریز بھی ان کی آرٹ گیلری کا حصہ تھی وہ عمر بھر معاشی مسائل کا شکار رہے ۔ ان کے فن میں بے پناہ تنوع تھا ۔ لیکن افسوس فن ان کو معاشی آسودگی نہ دے سکا ۔
