حمید گل کی صاحبزادی کی ٹرانسپورٹ کمپنی سےسرکاری بس ڈپوواگزار کرا لیا گیا : آرمی چیف نوٹس لیں : عظمیٰ گل

راول پنڈی : محکمہ ٹرانسپورٹ پنجاب،ضلعی انتظامیہ اورپولیس نے ہفتہ کے روز راولپنڈی صدر میں واقع سابق آئی ایس آئی چیف حمید گل کی صاحبزادی عظمی گل کی ٹرانسپورٹ کمپنی واران کے ڈپو پر مبینہ قبضہ واگزار کرالیا۔یہ اڈہ گورنمنٹ ٹرانسپورٹ کمپنی جی ٹی ایس کی ملکیت تھا جو نواز شریف دور میں عظمیٰ گل کو لیز پر دے دیا گیا تھا ۔
پولیس نے عظمی گل، ان کے شوہراور ٹرانسپورٹ کمپنی کے ملازمین کو دھکے دے کر دفتر سے نکال دیا اوران کا سامان قبضے میں لے لیا۔اس واقعے کی ویڈیو بھی سوشل میڈیا پر وائرل ہے ۔
عظمی گل نے بتایا کہ انہیں زبردستی گھسیٹتے ہوئے دفتر سے باہر نکالاگیا اور میرے خاوند جو ایک ریٹائرڈ فوجی افسر ہیں انہیں بھی تشدد کانشانہ بنایاگیا۔انہوں نے اپنے ٹوئٹر اکاﺅنٹ پرلکھا کہ میرے پاس لیز کی اراضی تھی جس کاعدالت کی جانب سے سٹے حاصل کیاگیا ہے۔
انہوں نے کہاکہ سیکرٹری آرٹی اے نے چیف سیکرٹری پنجاب میجر(ر) اعظم کے ایماءپر یہ ساری کارروائی کی کیونکہ انہیں میرے شوہر کے ساتھ ذاتی عداوت ہے۔اتوار کو اسلام آباد میں پریس کانفرنس سے خطاب کرتے ہوئے انہوں نے آرمی چیف اور چیف جسٹس آف پاکستان سے مطالبہ کیا کہ وہ صورتحال کا نوٹس لیں اور اس واقعہ میں ملوث افراد کے خلاف کارروائی کریں۔ انہوں نے کہاکہ میں ٹرانسپورٹ ڈپو پر قبضہ کرنے والے افسران کے خلاف توہین عدالت کی کارروائی بھی کروں گی۔