کمرے میں بیٹیاں بھی سوئی ہوئی تھیں۔۔۔۔ میر ی چارپائی تھوڑی سی فاصلے پر تھی۔۔۔۔۔۔ گہری نیند میں جب میرا بازو ہلایا۔۔۔ بہتیرا۔۔۔۔۔ ہا۔۔۔ ں۔۔۔ آ۔۔۔۔۔ ں کرکے کروٹ بدلی ۔۔ پر باز ہی نہ آۓ۔۔۔۔۔۔۔۔۔۔
سرہانے کھڑے رہے
۔۔۔۔
آخر اٹھ کر گئی۔ دوسرے کمرے میں چٹائی پڑی تھی۔۔۔۔۔ نیچے لٹا دیا ۔۔ ۔۔۔۔
ذرا خیال نہیں کرتے۔
یہاں بھی تو عورت کو آسائش چاہئے۔۔۔۔ تھوڑا مجھے بھی جگا لو۔۔۔ آدھی سوئی۔۔۔ آدھی جاگی۔۔ ۔۔۔جب تک جاگی۔۔۔۔۔
میں اپنے وجود کی طلب وجود میں بھر کے دوبارہ بستر پر جا لیٹی۔۔۔ اور سونے کی کوشش کرتی رہی۔
آخر نیند آ ہی گئی۔۔۔ سارے دن کی تھکن تھی۔ کونسا کام والی آتی تھی۔۔۔ سارا دن کام ہی نہیں ختم ہوتے۔کہ تھوڑی سی کمر ہی ٹکا لوں۔
صبح اٹھ کر پانی کا دیگچا چڑھایا۔۔۔۔ پانی گرم ہوا تو بالٹی میں ڈال کر غسل خانے لے گئی اور ڈبکی لگا کر باہر نکلی۔۔۔۔۔ تو چولہے کے پاس کھڑے تھے۔۔۔ چاۓ کی کیتلی چولہے پر دھری تھی۔
"تجھے تو سارا دن ساری رات سونے سے ہی فرصت نہیں۔۔۔۔ نکمی عورت۔۔۔ چل ناشتہ بنا دے۔۔۔ جلدی سے۔۔۔ ”
انڈے میں تھوڑا نمک زیادہ ہو گیا۔۔۔ تو پلیٹ۔۔۔ ڈانس کرتی۔۔۔۔ انڈہ الٹتی۔۔ میرے پاس پلٹ آئی۔۔۔۔۔۔ نہ مجھ میں کوئی مزا ہے نہ میرے پکے انڈے میں۔۔! ہر شے میں نمک زیادہ ہی ہو گیا ہے۔ اگر جو بچوں کی لائن نہ لگی ہوتی۔۔۔۔ مجھے بھی کبھی کا انڈے کی طرح باہر الٹ چکے ہوتے۔ آدھا درجن بچوں نے دروازہ بند کیا ہے۔ سمجھو کہ کنڈی ہی لگا دی ہے۔
میں نے پانی گرم کرکے غسل خانے میں رکھ دیا۔۔۔۔ کپڑے استری کر دئیے۔۔۔۔ نہا دھو کر ، خوشبو لگا کر گھر سے باہر نکلے ہی تھے ۔۔۔۔ کہ ہنسی کی آواز آئی۔۔۔۔۔۔
جانے ماسی حاجراں کی کونسی بات نے دل میں شگوفے کھلا دئیے تھے۔۔۔۔۔ماسی حاجراں بھی ناں۔۔۔۔۔سارا دن گلی میں ہی کھڑی رہتی ہے۔اور کیا کرے محلے کی خبر گیری بھی تو ضروری ہے ۔ چین کہاں آتا ہے اپنے گھر میں اسے۔
اور
میں
منے کے ابا کے دور جاتے ہوۓ قہقہے کی گونج دیر تک کانوں میں پہنے بیٹھی رہی۔
