لاہور :پاکستان تحریک انصاف (پی ٹی آئی) کے رہنما شاہ محمود قریشی کو 9 مئی کے 8 مقدمات میں گرفتار کرنے کے معاملے پر پی ٹی آئی کا ردعمل سامنے آگیا ہے۔
شاہ محمود کی گرفتاری پر اپنے ردعمل میں ترجمان تحریک انصاف نے کہا کہ شاہ محمود قریشی کی کسی بھی مقدمے میں گرفتاری کا کوئی جواز نہیں، جن مقدمات میں گرفتاری ڈالی گئی ہے ان میں عدالت نے انہیں ضمانت دے رکھی ہے۔
اپنے بیان میں پی ٹی آئی کے ترجمان نے کہا کہ سائفر مقدمے کا ردی کی ٹوکری کی نذر ہونا یقینی ہے، عدالتی فیصلے کوعملاً غیر مؤثر کر کے انہیں قید میں رکھنے کیلئے قانون کی پھر سے دھجیاں اڑائی گئی ہیں۔
ترجمان کا کہنا تھا کہ شاہ محمود قریشی کو بانی پی ٹی آئی کے نظریے پر جم کر کھڑا رہنے کی سزا دی جا رہی ہے۔
لاہور پولیس نے اڈیالہ جیل میں قیدشاہ محمود قریشی کو9 مئی کے 8 مقدمات میں گرفتارکرلیا
پی ٹی آئی کے ترجمان نے اپنے بیان میں مزید کہا کہ جھوٹے، جعلی، من گھڑت مقدمات میں بانی پی ٹی آئی اور ان کے ساتھیوں کو جیل میں رکھنا مشکل ہو رہا ہے۔
انہوں نے کہا کہ لاقانونیت کی نئی حدوں کو چھوا جا رہا ہے، اس ظالمانہ حرکت کے خلاف ہر ممکن کارروائی کریں گے، اپنے بے گناہ قائدین اور کارکنان کو جیلوں سے آزاد کروائیں گے۔
واضح رہے کہ گزشتہ روز لاہور پولیس نے اڈیالہ جیل میں قید پاکستان تحریک انصاف کے رہنما شاہ محمود قریشی کو 9 مئی کے 8 مقدمات میں گرفتار کرلیا تھا۔
پولیس کے مطابق لاہور پولیس کی خصوصی ٹیم شاہ محمود قریشی کو گرفتار کرنے اڈیالہ جیل راولپنڈی پہنچی جہاں تفتیشی ٹیم نے عدالت سے ملزم شاہ محمود قریشی کو لاہور منتقل کرنے کی اجازت مانگی تاہم عدالت نے سکیورٹی خدشات کے باعث شاہ محمود قریشی کو لاہور منتقل کرنے سے منع کر دیا۔
لاہور پولیس کے مطابق تفتیشی ٹیم کی استدعا پر عدالت نے شاہ محمود قریشی کا تین روزہ جسمانی ریمانڈ منظور کرلیا۔
تفتیشی ٹیم نے شاہ محمود قریشی کا اڈیالہ جیل میں ہی بیان ریکارڈ کیا، شاہ محمود قریشی ویڈیو لنک کے ذریعے انسداد دہشتگردی کی عدالت میں پیش ہوں گے۔
(بشکریہ:جیونیوز)
