ڈیرہ غازی خان:ڈیرہ غازی خان ،ملتان اورگردونواح کے علاقے عید کے دوسرے روز زلزلے کے شدید جھٹکوں سے لرزاٹھے۔ زلزلہ اتنا شدید تھا کہ لوگ خوف وہراس میں کلمہ طیبہ کا ورد کرتے ہوئے گھروں سے نکل آئے۔زلزلے کا مرکز ڈیرہ غازی خان سے 20کلومیٹر جنوب مشرق میں کوہ سلیمان کے سلسلے میں واقع تھا۔زلزلہ پیما مرکز کے مطابق زلزلہ شام 7:22پر آیا۔ریکٹر سکیل پر اس کی شدت 5.2 اور زلزلے کی گہرائی صرف 12کلومیٹر تھی۔ریسکیو1122کے مطابق فوری طورپر کسی جانی و مالی نقصان کی اطلاع نہیں ملی۔تاہم زلزلے کے فوراً بعد ریسکیوحکام کوالرٹ کردیاگیا ۔زلزلے کے جھٹکے ڈیرہ غازی خان کے علاوہ ملتان،بہاولپور،اچ شریف،کوٹ ادو،مظفرگڑھ، جلالپور پیروالہ،جام پور،راجن پور،لیہ او ر گردونواح کے علاقوں میں بھی محسوس کیے گئے۔
