”ویلا مک گیا، ہنڑ ساکوں اجازت ڈیو“ : ایم ڈی گل بھی چلے گئے

ملتان:سرائیکی کے معروف صداکا ، اداکار اور ٹی وی کمپیئر ایم ڈی گل ہفتے کے روز کراچی میں انتقال کرگئے۔ ان کی عمر 62برس تھی اوروہ ذیابیطس کے مریض تھے۔ ایم ڈی گل کاتعلق بہاولپور سے تھا۔ان کا اصل نام محمد دین گل تھا۔ انہوں نے ریڈیو پاکستان بہاولپور سے اپنے کیریئر کا آغاز کیا اور ریڈیو پاکستان ملتان سے بھی منسلک رہے۔اس کے علاوہ انہوں نے مختلف سکولوں میں پتلی تماشے بھی کیے۔بعد ازاں وہ کراچی چلے گئے اور این ٹی ایم اور وسیب ٹی وی سے منسلک ہوگئے۔
وسیب ٹی وی کے سابق پروگرام منیجر توقیربیگ نے اے پی پی سے بات چیت کرتے ہوئے بتایا کہ ایم ڈی گل کی وفات سے سرائیکی وسیب اداکار اور منفرد میزبان سے محروم ہوگیا۔ ایم ڈی گل نے این ٹی ایم میں ان کے ساتھ ڈرامہ سیریل ڈیڈی میں کام کیا۔ اس کے علاوہ این ٹی ایم کے مشہور ڈرامہ سیریل ”پس آئینہ “ سمیت مختلف ڈراموں میں اپنے فن کا مظاہرہ کیا۔ اسی دوران وسیب ٹی وی نے انہیں نائٹ شو کا میزبان بنایا اور یہ شو” ایم ڈی گل دے نال “کے نام سے کئی برس تک مقبول رہا۔ ایم ڈی گل اپنی سادہ طبیعت ،خالص سرائیکی لہجے کے باعث بہت مشہور ہوئے۔ وہ سرائیکی خطے کے مقبول ترین ٹی وی میزبانوں میں شامل تھے۔ ان کی نماز جنازہ سوموار کے روز کراچی میں ادا کی جائے گی۔