اسلام آباد : سندھ، پنجاب اور بلوچستان میں منگل کو نئے مریض سامنے آنے کے بعد پاکستان میں کورونا وائرس سے متاثر ہونے والے افراد کی تعداد 237 تک پہنچ گئی ہے جبکہ ملک کے وزیرِ خارجہ شاہ محمود قریشی نے چین کے دورے سے واپسی پر پانچ دن کے لیے ’سیلف آئسولیشن‘ اختیار کرنے کا فیصلہ کیا ہے۔
دوسری جانب وفاقی وزیر تعلیم شفقت محمود نے اعلان کیا ہے کہ تمام امتحانات یکم جون تک ملتوی کر دئے گئے ہیں۔ وزیر خارجہ نے بدھ کو پاکستان واپسی پر نجی ٹی وی چینل جیو نیوز سے بات کرتے ہوئے کہا کہ ان کے ٹیسٹ کے نتائج بدھ کی شام تک متوقع ہیں تاہم اگر وہ منفی بھی ہوئے تب بھی وہ رضاکارانہ طور پر پانچ دن کے لیے ’خود ساختہ تنہائی‘ میں رہنے کا فیصلہ کر رہے ہیں۔شاہ محمود قریشی پاکستان کے صدر ڈاکٹر عارف علوی کے ہمراہ چین کے دورے پر گئے تھے۔
ادھر سندھ میں مریضوں کی تعداد میں تیزی سے اضافے کے بعد صوبائی حکومت نے بدھ سے صوبے بھر میں جزوی ’لاک ڈاؤن‘ کا اعلان کیا ہے جس کے تحت کاروباری مراکز، پارک اور ریستوران 15 دن کے لیے بند کر دیے گئے ہیں جبکہ جمعرات سے سرکاری دفاتر بھی بند کر دیے جائیں گے۔
سرکاری اعدادوشمار کے مطابق اس وقت سندھ میں 170، پنجاب میں 26، بلوچستان اور خیبر پختونخوا میں 16، 16، اسلام آباد میں چار اور گلگت بلتستان میں کورونا کے تین مریض موجود ہیں۔
کورونا: پاکستان میں 237 متاثرین،تمام امتحان یکم جون تک ملتوی ، وزیرِ خارجہ سیلف آئسولیشن میں چلے گئے
ایڈیٹر2 Views
