لودھراں : لودھراں میں پولیس نے منشیات سے بھرا آئل ٹینکر پکڑ کر کروڑوں روپے مالیت کی چرس برآمد کرلی۔
ڈی پی او عبدالرؤف بابرنے پریس کانفرنس کرتے ہوئے کہا کہ کوئٹہ کے علاقے ہزار گنجی سے 2 ملزم عباس اور طارق ایک آئل ٹینکر کے خفیہ خانوں میں 3 کروڑ مالیت کی سوا 8 من چرس چھپا کر جنوبی پنجاب میں اسمگل کررہے تھے۔ڈی پی او نے بتایا کہ پولیس نے مخبری پر اڈہ پرمٹ کے قریب آئل ٹینکر کو روک کر اس کے خفیہ خانوں میں چھپائی ہوئی چرس برآمد کرلی اور 2 ارکان کو گرفتار کرکے ان کے خلاف مقدمہ درج کرلیا۔
ڈی پی او کا کہنا تھا کہ منشیات کی بھاری کھیپ پکڑنے والی پولیس ٹیم کو نقد انعامات اور سرٹیفکیٹ دیں گے۔
