پشاور : خیبرپختونخوا کے ضلع ٹانک میں ٹریفک پولیس کی گاڑی پر مسلح افراد کی فائرنگ سے 3 پولیس اہلکار شہید ہوگئے۔
تفصیلات کے مطابق ٹانک کے علاقے وزیرآباد میں موٹر سائیکل پر سوار نامعلوم مسلح افراد نے ٹریفک پولیس کی گاڑی پر اندھا دھند فائرنگ کر دی اور اس کے بعد موقع سے فرار ہو گئے۔
ٹریفک پولیس کی گاڑی پر مسلح افراد کی فائرنگ 3 پولیس اہلکار شہید ہوگئے۔ مسلح افراد کی فائرنگ سے دو شہری بھی زخمی ہوگئے۔ شہید پولیس اہلکاروں میں گل امین اور سلیم شاہ قریشی شامل ہیں، حملہ آور پولیس کی گاڑی اور اسلحہ بھی ساتھ لے گئے۔
واقعے کے بعد علاقے میں سیکیورٹی سخت کر دی گئی۔ پولیس کی بھاری نفری نے علاقے کو گھیرے میں لے لیا۔
وفاقی وزیرداخلہ محسن نقوی نے واقعہ کی مذمت کرتے ہوئے کہا کہ شہید اہلکاروں کی قربانی کوسلام پیش کرتے ہیں، دکھ کی گھڑی میں شہداءکے لواحقین کے ساتھ کھڑے ہیں۔ دہشتگردی کیخلاف جنگ میں شہداءکی لازوال قربانیاں رائیگاں نہیں جائیں گی۔
دوسری جانب گلگت بلتستان کے علاقے چلاس میں شیر نالہ کے قریب بشیداس زیرو پوائنٹ پر جی بی اسکاؤٹس کی پٹرولنگ گاڑی پرفائرنگ سے 3 اہلکار زخمی ہوگئے۔
پولیس کے مطابق پہاڑی کی جانب سے فائرنگ کے نتیجے میں 3 اہلکار زخمی ہوئے، جن میں 2 ایس ایس یوپولیس اہلکار اور ایک جی بی اسکاؤٹس جوان شامل ہیں۔ زخمی اہلکاروں کو بشیداس ایف ڈبلیو او اسپتال منتقل کردیا گیا۔
( بشکریہ : سماء نیوز )
