رضی الدین رضی کا کتاب کالم : خلیل الرحمٰن قمر اور ماریہ اسلم کی کتاب’ محبت کا تجسیم گر ‘

خلیل الرحمن قمر آج کل ایک ٹی وی شو پرہونے والی گفتگو کے حوالے سے خبروں کاموضوع ہیں ۔خبروں کا موضوع توخیر وہ ہمیشہ ہی رہتے ہیں لیکن ان کے قارئین اورناظرین کی تعداد بھی ہزاروں میں ہے۔خلیل الرحمن قمر کو ان کے ابتدائی زمانے میں لکھے گۓ ڈرامے "بوٹا فرام ٹوبا ٹیک سنگھ "ہی سے کامیابی اور شہرت ملنا شروع ہو گئی تھی مگر انہیں اصل شہرت اس وقت ملی جب 4 برس قبل ان کے ڈرامے ”میرے پاس تم ہو“نے سینما گھروں میں مولاجٹ کے زمانے کے کھڑکی توڑ ہفتوں کی یاد تازہ کردی ۔
وہ بنیادی طورپر رومانوی کہانیاں لکھتے ہیں مگر چند برسوں سے ٹی وی شوزمیں خواتین کے بارے میں ان کے خیالات ہمیشہ تنازعات کاباعث بن جاتے ہیں ۔ جبکہ ان کی تحریر یں ان تنازعات سے مختلف نظریات کی عکاس ہیں۔گزشتہ ہفتے ماریہ اسلم صاحبہ کی کتاب ”محبت کاتجسیم گر(خلیل الرحمن قمر بحیثیت ڈراما نگار)“موصول ہوئی توہم اس سوچ میں پڑگئے کہ ماریہ نے ایک متنازع لکھاری کی ڈرامہ نگاری پر320صفحات پرمشتمل کتاب کیسے تحریر کردی ؟ ۔

پھر ہمیں معلوم ہوا کہ ماریہ اسلم کے اساتذہ میں قدرت اللہ شہزاد اورپروفیسر ڈاکٹرعاصم ثقلین شامل ہیں ۔ماریہ اسلم نے خلیل الرحمن قمر کی ٹیلی ڈراما نو یسی پرایم فل یا پی ایچ ڈی کا مقالہ لکھنے کی بجاۓ ایک مختلف نوعیت کا تحقیقی و تنقیدی کام کیا۔اس دوران ان کی ملتان میں خلیل الرحمن قمر سے بالمشافہ ملاقات بھی ہوئی ۔ایم فل اورپی ایچ ڈی کے ہم اس سے پہلے بھی بہت سے مقالات کوکتابی صورت میں دیکھ اورپڑھ چکے ہیں لیکن زیر نظر کام ان سے یکسر مختلف بھی ہے اورماریہ اسلم نے اس میں ان کےفکرو فن اور سماجی نظریات کی مختلف جہتوں کابہت خوبصورتی کے ساتھ احاطہ کیاہے ( شاید اس لیے کہ یہ پی ایچ ڈی کا مقالہ نہیں ۔) ماریہ اسلم کابنیادی تعلق لودھراں سے ہے اورآج کل وہ راولپنڈی کے ایک گورنمنٹ کالج میں اردوپڑھاتی ہیں۔ان کی تحریر میں روانی ہے اوران کا وسیع مطالعہ اس کتاب کو خوبصورت بناتاہے ۔ مختلف مقامات پراشعار کے برمحل استعمال نے کتاب کو مزید خوبصورت بنادیاہے ۔زیرنظرکتاب کی قیمت 1500روپے ہے اوریہ سخن سرائے پبلیکیشنز نے ملتان سے شائع کی ہے ۔