ملتان : الیکشن کمیشن آف پاکستان کی جانب سے ملک بھر میں ضمنی انتخابات روکنے کے معاملہ پر سابق وزیر اعظم یوسف رضا گیلانی کے صاحبزادے علی موسیٰ گیلانی نے ہائیکورٹ سے رجوع کرلیا۔ ہائیکورٹ نے چیف الیکشن کمشنر سے 13 ستمبر کے روز تفصیلی رپورٹ طلب کرلی ،عدالت نے حکم دیا کہ ملتان میں کوئی سیلاب نہیں الیکشن ملتوی کرنے کی وجوہات بتائی جائیں ، دوران سماعت عدالت نے ریمارکس دیتے ہوئے کہا کہ اگر تفصیلی جواب جمع نہیں ہوتا تو عدالت فیصلہ کرے گی ،علی موسی گیلانی کے وکیل علی صدیقی نے کہا کہ سیٹ خالی ہونے پر 60 روز کے اندر الیکشن کرانا انتہائی ضروری ہے
درخواست گزار نے کہا کہ 20 ستمبر کو 60 روز مکمل ہوجائیں گے لیکن الیکشن کمیشن نے انتخاب روک دیا، حلقہ این اے 157 میں الیکشن سے دو دن پہلے الیکشن کمیشن نے غیر قانونی فیصلہ دے دیا، الیکشن کیجانب سے الیکشن ملتوی کا حکم معطل کیا جائے ،دوران سماعت عدالت نے ریمارکس دیتے ہوئے کہا کہ اگر چیف الیکشن کمشنر عدالت کو مطمئن کر لیتے ہیں تو ٹھیک وگرنہ عدالت خود الیکشن کروانے کا حکم دے سکتی ہے، اس سے پہلے بھی ایسی بہت سی نظیر ملتی ہیں جس میں عدالت نے خود الیکشن کروانے کا حکم دیا ہو،
واضح رہے کہ گزشتہ روز الیکشن کمیشن آف پاکستان نے بڑا فیصلہ کرتے ہوئے ملک بھر میں قومی اور صوبائی سطح پر تمام ضمنی الیکشن ملتوی کرنے کا اعلان کر دیا تھاجن حلقوں میں الیکشن ملتوی ہوئے ہیں ان میں این اے 157، پی پی 139 شیخوپورہ، پی پی 241 بہاولنگر، این اے 22 مردان، این اے 24 چارسدہ، این اے 31 پشاور، این اے 45 کرم، این اے 108 فیصل آباد، این اے 118 ننکانہ، این اے 237 کراچی، این اے 239 کراچی، این اے 246 کراچی، پی پی 209 خانیوال کے حلقے شامل ہیں۔
