پاکستان میں کورونا کی نئی قسم اومیکرون کا پہلا کیس رپورٹ

کراچی : پاکستان میں کورونا وائرس کے ویرینٹ اومیکرون کے پہلے کیس کی تشخیص کراچی میں ہوگئی۔
محکمہ صحت سندھ کی ترجمان مہر خورشید نے اومیکرون کے پہلے کیس کی تصدیق کرتے ہوئے بتایا کہ متاثرہ مریض ایک خاتون ہیں اور آغا خان ہسپتال میں زیر علاج تھیں.ساتھ ہی انہوں نے یہ بھی کہا کہ خاتون نے کورونا وائرس سے بچاؤ کی ویکسین نہیں لگوائی تھی۔
خیال رہے کہ اومیکرون ویرینٹ گزشتہ ماہ سب سے پہلے جنوبی افریقہ میں رپورٹ ہوا تھا۔عالمی ادارہ صحت (ڈبلیو ایچ او) نے اومیکرون کی درجہ بندی ‘انتہائی تیزی سے منتقل’ ہونے والے ویرینٹ کے طور پر کی ہے اور اسے ڈیلٹا ویرینٹ کی کیٹیگری میں ہی شامل کیا گیا ہے۔
محکمہ صحت سے جاری بیان کے مطابق ریجنل ڈیزیز سرویلنس اینڈ ریسپانس یونٹ کراچی میں کووڈ 19 کے نئے ویرینٹ اومیکرون کا پہلا کیس 8 دسمبر شام 7 بجے رپورٹ ہوا۔
جس بعد ٹریسنگ، ٹیسٹنگ اور قرنطینہ، کووڈ ویکسینیشن اور این سی او سی کی ہدایات کے تحت وائرس کا پھیلاؤ روکنے کے لیے فوری طور پر ضلعی ریپڈ ریسپانس ٹیم، کراچی شرقی سے مشاورت کی گئی۔
( بشکریہ : ڈان ڈاٹ کام )