چاند ہرجائی ہے ہر گھر میں اتر جاتا ہے : نام ور شاعر اقبال ارشد کی آج پانچویں برسی ہے

ملتان ۔۔ گردو پیش نیوز ۔۔نامور شاعر ،دانشور اور واپڈا ملتان کے سابق افسر تعلقات عامہ اقبال ارشد کی پانچویں برسی آ ج منائی جا رہی ہے ۔ وہ چار ستمبر 2018 میں طویل علالت کے بعد انتقال کر گئے تھے ۔ان کی عمر 78 برس تھی۔اقبال ارشد 22 اکتوبر1940ء میں انبالہ میں پیدا ہوئے۔قیام پاکستان کے بعد وہ ہجرت کرکے ملتان آگئے۔ابتدائی تعلیم ملتان ہی سے حاصل کی۔پنجاب یونیورسٹی سے ایم اے کا امتحان پاس کیا ۔اقبال ارشد واپڈا کے علاوہ خاندانی منصوبہ بندی کے محکمہ میں بھی ملازم رہے۔انہوں نے ملتان اور لاہور میں واپڈا کے پی آر او کی حیثیت سے خدمات انجام دیں۔
1990ءمیں ان کے جواں سال بیٹے علی عدنان حیدر کا انتقال ہوگیا جس کے صدمے میں اقبال ارشد بینائی سے محروم ہوگئے۔اقبال ارشد نے پسند کی شادی کی تھی ۔ان کی اہلیہ ثریا سلطانہ کا دو فروری 2011ء میں انتقال ہوا۔اس کے بعد وہ مکمل تنہائی کاشکارہوگئے۔اقبال ارشد نے غزل کے علاوہ شاعر ی کی مختلف اصناف میں طبع آزمائی کی ۔وہ شاعری کی صنف خماسی کے بانی بھی تھے ۔۔اقبال ارشد کے گیارہ شعری مجموعے ہیں جن میں ” نظرانداز“، ”فصیل و پرچم “، ”منزل کی تلاش“، ”نوبہار“، ”سرمایہ حیات“، ”خماسی“، ”آبشار“، ”چاندنی کی جھیل“، ”بادلوں کے تلے“، ”کہکشاں کے درمیاں“ اور ” دکھوں کا آخری موسم“شامل ہیں۔اقبال ارشد کے بعض اشعار آج بھی زبان زد عام ہیں
تو اسے اپنی تمناؤں کا مرکز نہ بنا
چاند ہرجائی ہے ہر گھر میں اتر جاتا ہے
اقبال ارشد ریڈیو پاکستان ملتان کے ساتھ بھی فیچررائٹر ،ڈرامہ نگار اور براڈکاسٹر کی حیثیت سے منسلک رہے۔وہ طویل عرصہ تک ریڈیو پاکستان میں بچوں کے پروگرام میں ”بھائی جان “ کی حیثیت سے میزبانی کے فرائض انجام دیتے رہے۔اقبال ارشد طویل عرصہ سے صاحب فراش تھے۔
ان کی وفات کی خبر ملتان سمیت ملک بھر میں دکھ کے ساتھ سنی گئی۔ان کی کمی ملتان میں ہمیشہ محسوس کی جائے گی ۔