جناح ہاؤس دیکھا تو دل خون کے آنسو رو رہا تھا، اسے راکھ کا ڈھیر بنا دیا گیا: مریم نواز

لاہور:وزیراعلیٰ پنجاب مریم نواز نے کہا ہےکہ جناح ہاؤس دیکھا تو دل خون کے آنسو رو رہا تھا، اسے راکھ کا ڈھیر بنا دیا گیا۔
لاہورمیں گورنمنٹ پولی ٹیکنکل کالج فار گرلز میں خطاب کرتے ہوئے مریم نواز نے کہا کہ ہم نے بچوں کو مار دو ، مر جاؤ ، جلا دو اور توڑ دو کا سبق نہیں دینا ۔خوشی ہے کہ اسکلز ڈویلپمنٹ میں بچوں کی کثیر تعداد حصہ لے رہی ہے ۔
وزیراعلیٰ پنجاب نے کہا کہ طلبہ کے لیے بائیک اسکیم لائے، ہائیکورٹ کے جج نے اسکیم روک دی، جج صاحب کہتے ہیں کہ طلبہ یہ بائیک لے کر گرلز کالج کے سامنے جائیں گے، جب بچوں کے ہاتھ میں پیٹرول بم دیے جاتے ہیں اس وقت کوئی عدالت حرکت میں نہیں آیا۔
وزیراعلیٰ مریم نواز کا کہنا تھا کہ ان کی پارٹی نے کبھی بچوں کے ہاتھ میں پیٹرول بم نہیں دیے اور نہ ہی ان کو سکیورٹی فورسز کے سر پھوڑنے کا کہا، ہم بچوں کو ای بائیکس اورپیٹرول بائیکس تقسیم کر رہے ہیں۔
لاہور ہائیکورٹ نے پنجاب حکومت کو طلبہ میں الیکٹرانک بائیکس کی تقسیم کا عمل روک دیا
انہوں نے کہا کہ اسکلز ڈویلیپمنٹ کی تعلیم بالکل مفت دی جا رہی ہے ، اسکلز ڈویلیپمنٹ کورسز متعدد شہروں میں شروع کر رہے ہیں۔
مریم نواز کا کہنا تھا کہ مارکیٹ ڈیمانڈ کے مطابق اپنے نصاب میں تبدیلی لائے ہیں ، چاہتے ہیں کہ فارغ التحصیل ہونے سے پہلے ہی بچوں کو نوکری مل جائے۔
(بشکریہ:جیونیوز)