نشترہسپتال کاجدید ترین برن یونٹ ڈاکٹروں کی سیاست کی نذر ہوگیا۔ پی ایم اے کے احتجاج کے بعد نئے سربراہ ڈاکٹر نوید اختر استعفے پر مجبور

ملتان:ایگزیکٹو ڈائریکٹر پاک اٹالین ماڈرن برن یونٹ نشترہسپتال ملتان پروفیسر ڈاکٹرچوہدری نویداختر نے اپنے عہدے سے استعفی دے دیا ہے۔ انہیں چند روز قبل ہی یہ ذمہ داریاں سونپی گئی تھیں۔ ڈاکٹرنوید اختر کا کہنا ہے کہ گزشتہ چندروز کے دوران برن یونٹ میں جو واقعات رونما ہوئے ان کی وجہ سے میں یہ ذمہ داریاں اٹھانے سے معذرت کرتاہوں ۔
واضح ہو کہ بدھ کے روز برن یونٹ کے عملے میں لڑائی ہوئی جس کے نتیجے میںدوافراد زخمی ہوگئے تھے۔ انہوں نے بتایا کہ میرے چارج سنبھالنے کے بعد عملے کے درمیان لڑائی جھگڑوں کے متعدد واقعات ہوئے جو پریشانی کاباعث ہے۔اس کے علاوہ سٹاف کے باہمی اختلافات اور ہسپتال کے معاملات میں سیاسی مداخلت بھی جاری ہے۔اس صورتحال میں میں کام جاری نہیں رکھ سکتا۔ انہوں نے اپنا استعفی سیکرٹری ہیلتھ پنجاب کو ارسال کردیا۔
اس سے قبل ان کی تعیناتی کے بعد سے پاکستان میڈیکل ایسوسی ایشن کی جانب سے ان کے خلاف مہم شروع کردی گئی تھی ۔پی ایم اے کے صدر ڈاکٹر مسعود الرﺅف ہراج ان کے خلاف مہم کی قیادت کررہے تھے اوران کی تعیناتی کے بعد برن یونٹ کے ڈاکٹروں کی جانب استعفے بھی دے دیئے گئے تھے۔ برن یونٹ کی صورتحال پر مریضوں اوران کے لواحقین نے شدید احتجاج کیا ہے اورکہا ہے کہ جنوبی پنجاب جدید ترین برن یونٹ ڈاکٹر وں کی سیاست کی نذر ہورہاہے۔ پی ایم اے کے قائدین اپنے ذاتی مقاصد کے لیے مریضوں کی پریشانی کاباعث بنے ہوئے ہیں۔