ملتان : نامور شاعر اورماہرتعلیم پروفیسر انور جمال نے کہاہے کہ بڑا فنکاروہی ہوتا ہے جو اپنی تخلیقات کے ذریعے محبتیں اور آسودگی تقسیم کرے۔ انہوں نے کہاکہ پہلی مسرت تخلیق کار اپنی تخلیق سے خودحاصل کرتا ہے اورپھراس کادائرہ کار پوری کائنات تک پھیل جاتا ہے۔
ان خیالات کااظہار انہوں نے سویڈن سے آئے ہوئے نامور شاعر اور دانشور جمیل احسن کے شعری مجموعے”آسودگی“ کے اجراءکے موقع پران کے اعزاز میں منعقدہ شعری نشست سے خطاب کے دوران کیا۔ تقریب کا اہتمام معروف شاعر اور خطاط محمد مختارعلی نے ملتان آرٹ گیلری میں کیاتھا۔ اس موقع پر خطاب کرتے ہوئے پروفیسر انور جمال نے کہاکہ جمیل احسن کی کتاب ”آسودگی“ دیارغیر میں بسنے والوں کے دکھوں کی آئینہ دار ہے۔انہوں نے کہا کہ دیارغیر میں بسنے والے در اصل وہ پرندے ہیں جنہیں تلاش رزق کے لیے اپنے وطن سے ہجرت کرناپڑتی ہے۔
تقریب میں نامور شاعروں ،دانشوروں اور فنون لطیفہ سے وابستہ شخصیات نے بڑی تعداد میں شرکت کی۔ شرکاءمیں مستحسن خیال، رضی الدین رضی، محمد راشد سیال، ارشد خرم، شعیب ابراہیم، حکیم ضیاءالرحمن، پروفیسر شاہد عباس، آدم مختارشامل تھے ۔اس موقع پر شرکاء میں جمیل احسن کا شعری مجموعہ بھی تقسیم کیا گیا
