لاہور : سابق وزیراعظم اور چیئرمین پاکستان تحریک انصاف (پی ٹی آئی) عمران خان نے کہا ہے کہ مجھے گرفتار کرنے، نااہل کرنے اور جان سے مارنے تک کی پلاننگ ہو چکی ہے، میں گرفتار ہوا تو معاملات شاہ محمود قریشی اور پرویز خٹک جیسے سینیئر دیکھیں گے۔
زمان پارک میں سینیئر صحافیوں سے گفتگو کرتے ہوئے عمران خان نے کہا کہ موجودہ حکومت نے ملکی معیشت کو تباہ کر دیا ہے، الیکشن کے علاوہ کوئی حل نہیں ہے، الیکشن پی ٹی آئی ہی جیتے گی، آج بھی ریفرنڈم کروا کے دیکھ لیں رزلٹ سامنے سجائے گا۔
انہوں نے کہا کہ گرفتار کارکنوں کی رہائی کے لیے آج بھی وکلا کی میٹنگ بلائی ہے، مجھے معلوم ہے کہ مجھے گرفتار کرنے، نااہل کرنے اور جان سے مارنے تک کی پلاننگ ہو چکی ہے، میں گرفتار ہوا تو معاملات شاہ محمود قریشی اور پرویز خٹک جیسے سینیئر دیکھیں گے، عارف علوی آئین کے مطابق کام کر یں گے۔
سابق وزیراعظم اور چیئرمین پاکستان تحریک انصاف (پی ٹی آئی) عمران خان نے کہا ہے کہ فوج سے کوئی لڑائی نہیں ہے، یہ فوج میری ہے، جلد وقت تبدیل ہو نے والا ہے، آنے والے دنوں میں بڑے سرپرائز دوں گا۔
عمران خان نے کہا کہ جو لوگ چھوڑ کر جا رہے ہیں ان میں سے کچھ مجبور ہیں اور کچھ بے نقاب ہوئے ہیں، پارٹی کے لیے نوجوان بہترین سرمایہ ہیں، آئندہ ٹکٹ اُن کا حق ہے۔انہوں نے کہا کہ سب کچھ پلاننگ کے تحت ہمارے خلاف کیا گیا، اس چیز پر حلف دیتا ہوں کہ تشدد اور توڑ پھوڑ کے حوالے سے کبھی نہیں کہا، اگر مجھے گولیاں لگنے پر توڑ پھوڑ نہیں ہوتی تو اب کیسے ممکن تھا، جب ہم عوامی طور پر جیت رہے ہیں تو ہم کیوں توڑ پھوڑ کی جانب جائیں گے۔
( بشکریہ : ڈان نیوز )