اسلام آباد : اسلام آباد ہائی کورٹ کی جانب سے تحریک انصاف کے رہنما فواد چوہدری کی رہائی کا حکم جاری کیے جانے کے چند لمحے بعد ہی دارالحکومت کی پولیس نے انہیں پھر گرفتار کرنے کی کوشش کی۔
ڈان نیوز کے مطابق اسلام آباد ہائی کورٹ کی جانب سے رہائی کا حکم صادر کیے جانے کے بعد فواد چوہدری اپنے گھر جانے ہی والے تھے کہ ایلیٹ فورس نے ان کی گاڑی کا راستہ روکا جس کے بعد تحریک انصاف کے رہنما نے فوراً اپنی گاڑی کا دروازہ کھولا اور بھاگتے ہوئے اسلام آباد ہائی کورٹ کے احاطے میں داخل ہو گئے۔
فواد چوہدری وہاں سے فوراً فرار ہوتے ہوئے جسٹس میاں گل حسن اورنگزیب کی عدالت میں پہنچ گئے اور تحریک انصاف کے رہنما کی حفاظتی ضمانت کی منظوری کے حوالے سے عدالتی حکم کا انتظار کیا جا رہا ہے۔
فواد چوہدری کی اہلیہ نے بھی سماجی رابطوں کی ویب سائٹ ٹوئٹر پر پیغام میں کہا کہ فواد چوہدری کو دوبارہ گرفتار کرنے کی کوشش کی گئی۔
( بشکریہ : ڈان نیوز )
