خیبر پختونخوا اسمبلی تحلیل کرنے کی تیاریاں : پنجاب میں نگران وزیر اعلی کے لیے تین ناموں پر غور

پشاور : وزیر اعلی خیبر پختونخوا محمود خان نے کہا ہے کہ کے پی اسمبلی کی تحلیل کے لیے سمری منگل کو ارسال کر دی جائے گی۔
واضح رہے کہ پنجاب اسمبلی پہلے ہی تحلیل ہو چکی ہے جہاں نگران وزیر اعلی کے انتخاب کا مرحلہ شروع ہو چکا ہے۔
سوشل میڈیا پر جاری بیان میں وزیر اعلی محمود خان نے کہا کہ ’قائد عمران خان کے حکم کے مطابق خیبر پختونخوا اسمبلی کی تحلیل کیلئے سمری بروز منگل گورنر کو ارسال کر دی جائے گی۔‘
انھوں نے دعوی کیا کہ ’تحریک انصاف دوتہائی اکثریت سے دوبارہ حکومت میں آئے گی۔‘
دوسری جانب تحریک انصاف اور ق لیگ نے پنجاب میں نگران وزیر اعلی کے عہدے کے لیے احمد نواز سکھیرا، نصیر احمد خان اور ناصر سعید کھوسہ کے نام تجویز کرنے کا حتمی فیصلہ کیا ہے۔
وزیر اعلی پنجاب چوہدری پرویز الہی نے لاہور میں چیئرمین تحریک انصاف عمران خان سے ملاقات کے بعد میڈیا سے بات کرتے ہوئے بتایا کہ نگران وزیر اعلی کے لیے تین نام مشارت سے فائنل کیے گئے ہیں جن میں پہلا نام احمد نواز سکھیرا کا ہے۔
پرویز الہی نے کہا کہ یہ نام گورنر پنجاب کو بھجوائے جائیں گے اور امید ہے کہ کسی ایک نام پر اتفاق ہو سکتا ہے۔
ایک سوال کے جواب میں ان کا کہنا تھا کہ ق لیگ نے تحریک انصاف میں ضم ہونا ہے یا نہیں، اس پر مشاورت جاری ہے۔
انھوں نے کہا کہ مونس الہی کی خواہش ہے کہ ق لیگ پی ٹی آئی میں ضم ہو جائے۔