ملتان : (اے پی پی):کالونی ٹیکسٹائل ملز کے شہداکی45ویں برسی آج پیر کو منائی جارہی ہے۔
مل مزدوروں پر 2جنوری 1978ء کو اس وقت فائرنگ کی گئی جب وہ اپنے بونس کے لیے احتجاج کررہے تھے۔اس واقعہ میں بہت سے مزدور شہید ہوگئے تھے اور اسے مزدور تحریک کے حو الے سے اہم ترین واقعات میں شمار کیاجاتا ہے۔کالونی ملز فائرنگ میں کتنے مزدور لقمہ اجل بنے یہ راز اب تک حل نہیں ہوسکا۔مزدوروں کی تعدادکے بارے میں مختلف دعوے کیے گئے۔اس واقعہ کی تحقیقات کامطالبہ بھی کیاجاتا رہا لیکن عملی طورپر اس کے ذمہ دار افراد گرفت میں نہ آسکے۔مزدورکسان کمیونسٹ پارٹی کے رہنما ء محفوظ خان شجاعت نے اے پی پی سے بات چیت کرتے ہوئے کہاکہ ہم ہرسال ان شہداکو یاد کرتے ہیں لیکن افسوس کہ سرمایہ دارانہ نظام میں ہم آج تک ان کے قاتلوں کو کیفر کردار تک نہ پہنچا سکے۔انہوں نے کہاکہ ہر سال کی طرح اس مرتبہ بھی شہدا کی یاد میں جلسہ منعقد کیاجائے گا۔مزدور رہنما دلاور عباس نے کہاکہ مزدور تحریک آج بھی جاری ہے۔
ہم اپنے بھائیوں کی قربانی کو فراموش نہیں کریں گے اور مزدوروں کے حقوق کے لیے جدوجہد جاری رکھیں گے۔
