پی ٹی آئی رہنماعامر ڈوگرنے احتجاجی مظاہروں کے لیے ہدایات جاری کر دیں

اسلام آباد: پاکستان تحریک انصاف (پی ٹی آئی) کے رہنما عامر ڈوگر کی احتجاجی مظاہروں سے متعلق آڈیو منظر عام پر آئی ہے۔
عامر ڈوگر کی آڈیو پی ٹی آئی ایم این ایز کے واٹس ایپ گروپ کےلیے پیغام پر مبنی ہے جس میں عامر ڈوگر گروپ ارکان کو دھرنے، احتجاج اور سڑکیں بلاک کرنےکی ہدایت کر رہے ہیں۔
اپنے پیغام میں عامر ڈوگرکا کہنا تھا کہ پارٹی چیئرمین، وائس چیئرمین اور سیکرٹری جنرل نے سختی سے ہدایت کی ہے، تمام ایم این ایز اپنے ریجن کے صدور سے ہدایت لیں گےکہ آپ کو احتجاج کے لیےکونسی جگہ الاٹ کی ہے اور کس مقام پر آپ کو احتجاج کرنا، دھرنا دینا اور روڈ بلاک کرنا ہے۔
عامر ڈوگر کا کہنا تھا کہ ایم این اے جس مقام پر ہوگا، سختی سےہدایت کی گئی ہے کہ وہ ویڈیو مجھےشیئر کرےگا، ایم این اے کی جانب سے بھجوائی گئی ویڈیو اوپر گروپ میں شیئرکروں گا، دو، تین دن سے تقریباً تمام ایم این ایز اس ملک کے لیے جدوجہدکر رہے ہیں اور متحرک ہیں، ان کی جدوجہد کو خراج تحسین پیش کرتا ہوں، یہ منصوبہ تین دن آج، کل اور پرسوں کا ہے۔
عامر ڈوگر کا مزید کہنا تھا کہ تمام ایم این اے حضرات اپنے ریجن کے صدور سے رابطہ کر کے اپنا اپنا پوائنٹ لے لیں، شام کو اس پوائنٹ پر آپ کو ایکٹویٹی کرنی ہے جو تین دن تک رہے گی، آپ کواپنی تصاویر اور خصوصی طور پر ویڈیوز گروپ میں شیئرکرنی ہیں، میں اس ویڈیو کو آگے ایک بڑے گروپ میں فارورڈ کردوں گا۔
( بشکریہ : جیو نیوز )