پشاور : شمالی وزیرستان کے قریب پاک افغان بارڈر پر دہشت گردوں نے فوجی قافلے پر حملہ کردیا جس کے نتیجے میں 7 فوجی شہید ہوگئے۔
پاک فوج کے ترجمان ادارے انٹرسروسز پبلک ریلیشنز ( آئی ایس پی آر) کی جانب سے جاری بیان کے مطابق دہشت گردوں کے حملے میں 7 فوجی شہید ہوئے جبکہ فائرنگ کے تبادلے میں چار دہشت گرد ہلاک ہوئے۔
آئی ایس پی آر کے مطابق شہید ہونے والوں میں حوالدار طارق یوسف، سپاہی سلیمان وقاص، سپاہی جنید علی، سپاہی اعجاز حسین، سپاہی وقار احمد، سپاہی محمد جواد امیر اور سپاہی ارشد علی شامل ہیں۔آئی ایس پی آر کے مطابق فوجی قافلے پر حملہ شمالی وزیرستان کے علاقے ایشام میں کیا گیا، دہشت گردوں کے خاتمے کیلئے علاقے میں کلیئرنس آپریشن جاری ہے، پاک فوج دہشت گردی کی لعنت کو ختم کرنے کیلئے پرعزم ہے، ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
گذشتہ روز ڈی جی آئی ایس پی آر جنرل بابر افتخار نے ایک پریس کانفرنس میں کہا تھا کہ اس سال کے پہلے تین ماہ کے دوران سکیورٹی فورسز کے افسران سمیت 97 اہلکار ہلاک ہوئے ہیں جبکہ سکیورٹی فورسز کی کارروائیوں میں 128 شدت پسند ہلاک اور 256 کو گرفتار کیا گیا ہے۔رواں سال اپریل کے مہینے میں ہونے والی ہلاکتیں اس مجموعی تعداد میں شامل نہیں ہیں۔
پاکستان کے نومنتخب وزیرِ اعظم شہباز شریف نے گذشتہ روز ایک ٹویٹ میں کہا ہے کہ ’کوئی کسی مغالطے میں نہ رہے، ہم ذمہ داران کے خلاف کارروائی کریں گے۔‘
ادھر عسکریت پسند تنظیم تحریک طالبان کی جانب سے جاری ایک بیان میں دعویٰ کیا گیا ہے کہ ان کی تنظیم کی کارروائیوں میں سکیورٹی فورسز کا جانی نقصان کہیں زیادہ ہوا ہے جبکہ ٹی ٹی پی کے کارکنوں کا نقصان بہت کم ہوا ہے۔
خیبرپختونخوا میں ضم ہونے والے قبائلی علاقوں میں تشدد کے واقعات معمول سے پیش آ رہے ہیں اور ان میں شمالی اور جنوبی وزیرستان اہم ہیں جہاں آئے روز سکیورٹی فورسز پر حملوں، جھڑپوں اور ٹارگٹ کلنگ کے واقعات کی اطلاعات موصول ہوتی رہتی ہیں۔
کالعدم تنظیم کے ترجمان محمد خراسانی نے ان 13 دنوں میں لگ بھگ ایک درجن سے زیادہ حملوں کی ذمہ داری قبول کی ہے اور ترجمان کے مطابق ان حملوں میں سکیورٹی فورسز کو بھاری جانی نقصان اٹھانا پڑا ہے۔
