کوروناو ائرس ۔ نشترمیڈیکل یونیورسٹی کے وائس چانسلرڈاکٹر مصطفی کمال پاشا وینٹی لیٹرپر چلے گئے

ملتان :کورونا وائرس کا شکارہونے والے نامور طبی ماہراور نشترمیڈیکل یونیورسٹی کے وائس چانسلرڈاکٹر مصطفی کمال پاشا وینٹی لیٹرپر چلے گئے ہیں۔ وہ گزشتہ کئی روز سے ایک نجی ہسپتال میں زیرعلاج ہیں جہاں ہفتے کی رات ان کی حالت تشویشناک ہوگئی جس کے بعد انہیں وینٹی لیٹر پر منتقل کردیاگیا۔ ذرائع کے مطابق ڈاکٹر مصطفی کمال پاشا تین ہفتے قبل کورونا وائرس کا شکارہوئے جس کے بعد انہیں ہسپتال منتقل کردیاگیا۔ہفتے کے روز ان کی ناک سے خون بہنا شروع ہوگیاتھا اور حالت زیادہ خراب ہونے پر ان کا علاج کرنے والی ڈاکٹروں کی ٹیم نے انہیں وینٹی لیٹر پرمنتقل کرنے کا فیصلہ کیا۔
ڈاکٹر مصطفی کمال پاشا کے قریبی حلقوں کاکہنا ہے کہ ان کے پھیپھڑوں نے کام کرنا بند کردیا ہے اوران کی حالت اب بہتر نہیں ہے۔ذرائع کا کہنا ہے کہ کورونا وائرس کا شکارہونے کے بعد ڈاکٹر مصطفی کمال نے پہلے گھر پر ہی تنہائی اختیارکی لیکن جب ان کی حالت خراب ہونا شروع ہوئی تو انہیں ہسپتال منتقل کردیاگیا۔چارروز قبل قائداعظم میڈیکل کالج کے پرنسپل ڈاکٹر جاوید اقبال نے ان سے فون پر بات کی اوران کی عیادت کے لیے آنے پر اصرارکیا۔تاہم ڈاکٹر مصطفی کمال نے اپنے دوست کو یہ کہہ کر روک دیا کہ جب تک میرا ٹیسٹ منفی نہیں آتا میں کسی سے ملاقات نہیں کروں گا۔ڈاکٹرجاوید اقبال سمیت ان کے تمام دوستوں اور شاگردوں نے ان کی صحیبابی کے لےے دعا کی اپیل کی ہے۔