کورونا سے گنجان آباد شہروں کو شدید خطرہ : ہوٹلوں کو قرنطینوں میں تبدیل کرنےکا فیصلہ

ملتان : کوروناوائرس کی وباءسے پاکستان کے گنجان آباد شہروں کو شدید خطرات لاحق ہیں۔ جن میں ملتان ،لاہور، فیصل آ باد،کراچی ،حیدرآباد کے علاوہ راولپنڈی بھی شامل ہے۔
ماہرین کا کہنا ہے کہ راولپنڈی لاہور ، ملتان کی گنجان آبادگلیوں اور محلوں میں اگر کوروناوائرس نے حملہ کردیا تو اس کے نتائج انتہائی خطرناک ہوں گے۔صورتحال سے نمٹنے کے لیے ہسپتال کم پڑجائیں گے اور طبی آلات بھی ناکافی ہوں گے۔دریں اثنا اسلام آباد کے اہم ہوٹلوں کو قرنطینوں میں تبدیل کیے جانے کا امکان ہے۔ جن ہوٹلوں کو قرنطینوں میں تبدیل کرنے پر غور کیا جارہاہے ان میں پی سی، شالیمار، میریٹ، ہالیڈے اور بحریہ ٹاﺅن کاسفاری کلب شامل ہیں۔اسی طرح لاہور ملتان اورکراچی کے بڑے ہوٹلوں کوبھی قرنطینوں میں بدلنے پر غور کیاجارہاہے۔
پنجاب میں شہریوں کو گھروں تک محدودرکھنے کے لیے فوج کی خدمات بھی حاصل کرلی گئی ہیں۔ ملتان سمیت مختلف شہروں میں فوجی اور رینجرز نے انتظامات سنبھال لیے ہیں اور مختلف مقامات پر ان کے اہلکار اور جوان تعینات کردیئے گئے ہیں۔