راحیل شریف کی سعودی اتحاد میں تقرری ریاست کا فیصلہ ہے : ترجمان پاک فوج

لندن : پاک فوج کے ترجمان میجر جنرل آصف غفورنے کہا ہے کہ جنرل راحیل شریف کی سعودی اتحاد میں بطور سربراہ تقرری ریاست کا فیصلہ ہے۔ لندن میں پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے میڈیا کو بریفنگ دیتے ہوئے کہا کہ ’پاکستان، افغانستان اور بھارت کے ساتھ اچھے تعلقات چاہتا ہے، پاکستان خطے میں کشیدگی نہیں چاہتا اور کسی پراکسی وار پر یقین نہیں رکھتا۔‘ ڈی جی آئی ایس پی آر کا کہنا تھا کہ ’پاکستان، سعودی عرب اور ایران کے ساتھ بھی اچھے تعلقات چاہتا ہے، جبکہ سعودی اتحاد میں راحیل شریف کی بطور سربراہ تقرری پاکستانی ریاست کا فیصلہ ہے۔‘ انہوں نے بتایا کہ ’آپریشن ردالفساد کے تحت مدرسہ اصلاحات پر کام ہو رہا ہے، جبکہ آپریشن کے نتائج جلد سامنے آنا شروع ہوں گے۔‘