ملتان : پنجاب کی تمام آرٹس کونسلوں کے نام خاموشی سے تبدیل کردیئے گئے ہیں اور ہر آرٹس کونسل کے نام کے ساتھ لفظ پنجاب کا اضافہ کردیاگیا ہے۔ملتان آرٹس کونسل کانام اب پنجاب آرٹس کونسل ملتان ہے۔ اسی طرح بہاولپور ، ڈیرہ غازی خان، ساہیوال، لاہور ، راولپنڈی ، فیصل آٰباد اوردیگرشہروں میں واقع آرٹس کونسلوں کے نام بھی تبدیل کردیئے گئے ہیں۔اس سلسلے میں ابھی باضابطہ نوٹیفکیشن جاری ہونا باقی ہے۔تاہم کسی اعلان کے بغیر ناموں کی اس تبدیلی پر عملدرآمد شروع کردیاگیا ہے
۔یہ انکشاف ملتان آرٹس کونسل میں گزشتہ ہفتے منعقد ہونے والے سرائیکی مشاعرے کی رپورٹ شائع ہونے کے بعد اس وقت ہوا جب معروف دانشور اور کالم نگار میر احمد کامران مگسی نے اپنی رپورٹ میں تقریب کا احوال بیان کرتے ہوئے ملتان آرٹس کونسل کا نام پنجاب آرٹس کونسل ملتان تحریر کیا۔انہوں نے اپنی رپورٹ سے پہلے یہ نوٹ بھی تحریر کیاکہ یہ رپورٹ میرے پیشہ ورانہ فرائض کے مطابق ترتیب دی گئی ہے ۔اس کا میرے ذاتی افکار سے ہم آہنگ ہونا ضروری نہیں۔رپورٹ میں انہوں نے لکھا کہ پنجاب آرٹس کونسل ملتان میں سرائیکی مشاعرہ منعقد ہوا۔اس بارے میں جب سوشل میڈیا پر ان سے سوال کیاگیا کہ انہوں نے ملتان آرٹس کونسل کو پنجاب آرٹس کونسل ملتان کیوں لکھا ہے تو انہوں نے جواب دیا کہ مجھے انتظامیہ کی جانب سے اس کی ہدایت کی گئی تھی۔ان کے اس انکشاف کے بعد سوشل میڈیا پر اس حوالے سے بحث کا آغاز ہوگیا کہ سرائیکی صوبے کے وعدے کے ساتھ برسراقتدار آنے والی حکومت نے سرائیکی وسیب میں کام کرنے والی آرٹس کونسلوں سے ان کی بنیادی شناخت بھی چھین لی ہے۔اس حوالے سے جب ملتان آرٹس کونسل کے ڈائریکٹر چوہدری طاہر محمود ارو ڈپٹی ڈائریکٹر سلیم قیصر سے رابطہ کیاگیا تو انہوں نےنام تبدیل ہونے کی تصدیق نہیں کی اور کہا ابھی ملتان آرٹس کونسل کا نام تبدیل نہیں کیا گیا ۔