کوئٹہ میں ایف سی کی چیک پوسٹ پر خود کش حملہ : تین جوان ہلاک 20 زخمی

کوئٹہ : اتوار کی صبح کوئٹہ میں ایف سی کی چیک پوسٹ پر خود کش حملے میں تین اہلکار شہید اور 20 زخمی ہو گئے۔
ایکسپریس نیوز کے مطابق کوئٹہ کے علاقہ سونا خان میں سیکیورٹی فورسز کی گاڑی کے قریب زوردار دھماکا ہوا جس کے نتیجے میں 3 اہلکار شہید جب کہ 20 زخمی ہو گئے۔ شہید اہلکاروں اور زخمیوں کو سی ایم ایچ اور ایف سی اسپتال منتقل کردیا گیا ہے۔لیویز ذرائع کے مطابق سیکیورٹی فورسز نے جائے وقوعہ کو گھیرے میں لے کر مزید نفری طلب کرلی ہے جب کہ حکام کو شبہ ہے کہ دھماکا خودکش بم حملہ ہوسکتا ہے تاہم بم ڈسپوزل یونٹ دھماکے کی وجہ جاننے کے لیے مزید تحقیقات میں مصروف ہے۔سی ٹی ڈی ترجمان کا کہنا ہے کہ قانون نافذ کرنے والے اداروں کے اہلکار جائے حادثہ پر موجود ہیں اور تحقیقات شروع کر دی گئی ہیں۔
ڈی آئی جی کوئٹہ نے دھماکے کی تصدیق کرتے ہوئے بتایا کہ دھماکے میں 3 افراد جاں بحق اور متعدد زخمی ہوئے جبکہ پولیس حکام کا کہنا ہے کہ خودکش حملہ آور کا ٹارگٹ سکیورٹی اہلکار تھے۔