ملتان:معروف سیاسی رہنما ،سابق وزیراعظم بے نظیر بھٹواورسابق صدر فاروق لغاری کے قریبی ساتھی ،کالم نگار ،تجزیہ نگار اورسابق ڈائریکٹرجنرل تعلقات عامہ ایوان صدر قسورسعید مرزابدھ کی شام لاہور میں انتقال کر گئے ۔
ان کی عمر 71 برس تھی اور گزشتہ 15 روز سے علیل تھے۔ قسورمرزاگزشتہ ہفتے شجاع آباد تھے ،طبیعت خراب ہونے پرانہیں لاہورمنتقل کردیاگیاتھا۔قسور سعید مرزا کا شمار ان سیاست دانوں میں ہوتا تھا جنہوں نے رواداری کو فروغ دیا ۔ ان کا بنیادی تعلق پیپلز پارٹی سے تھا تاہم وہ تمام سیاسی جماعتوں میں احترام کی نگاہ سے دیکھے جاتے تھے ۔
قسور سعید مرزا 1951 میں شجاع آ باد میں پیدا ہوئے ۔ انہوں نے ابتدائی تعلیم اپنے آبائی شہر سے حاصل کی میٹرک کے بعد وہ ملتان آ گئے اور یہاں سے گریجویشن اور قانون کی تعلیم حاصل کی ۔ انہوں نے سابق صدر فاروق لغاری کے سیکریٹری کی حیثیت سے بھی فرائض سر انجام دیے ۔ فاروق لغاری کے صدر منتخب ہونے کے بعد 1993 سے 1997 تک وہ ڈائیریکٹر جنرل تعلقات عامہ ایوان صدر کی حیثیت سے بھی فرائض سر انجام دیتے رہے ۔ انہیںکل ان کے آبائی شہر شجاع آباد میں سپرد خاک کیا جائے گا ۔
