عمران خان کی گرفتاری کے خلاف ملتان میں کوئی ردعمل سامنے نہیں آیا، پولیس کی وین انتظار کے بعد خالی واپس چلی گئی

سابق وزیراعظم اورپاکستان تحریک انصاف کے قائد عمران خان کی گرفتاری کے خلاف ملتان میں کوئی ردعمل سامنے نہیں آیا۔
ہفتے کے صبح عمران خان کوسزا سنائے جانے کے بعد انہیں گرفتار کیاگیا تو میڈیا کے نمائندوں نے فوری طورپر تحریک انصاف ملتان کی قیادت سے رابطوں کی کوشش کی۔ ملتان میں پاکستان تحریک انصاف سے تعلق رکھنے والے بیشتر رہنماءوفاداریاں تبدیل کرچکے ہیں یا گرفتارہیں۔ مختلف مقامات پرپی ٹی آئی کے دفاتر بھی بند کیے جاچکے ہیں۔ پی ٹی آئی کے بعض مقامی رہنماؤں نے نامعلوم مقامات سے ایک دوسرے کے ساتھ رابطے کیے ۔
ملتان پولیس بھی احتجاجی مظاہرے کے امکان کے پیش نظرچوکس رہی اور پولیس کی ایک گاڑی چونگی نمبر 9پر پہنچادی گئی۔یہ وہی جگہ ہے جوماضی میں پی ٹی آئی کے احتجاجی مظاہروں کا مرکزرہا ہے۔ تاہم آج وہاں پی ٹی آئی کا کوئی کارکن احتجاج کے لیے نہ پہنچا اور پولیس کی وین انتظار کے بعد خالی واپس چلی گئی۔