دبئی:آل پاکستان مسلم لیگ (اے پی ایم ایل) نے سابق صدر و جنرل ریٹائرڈ پرویز مشرف کی طبیعت تشویشناک ہونے کی تردید کردی۔خاندانی ذرائع کے مطابق پرویز مشرف کو گزشتہ ہفتے طبیعت خراب ہونے پر اسپتال منتقل کیا گیا۔ پرویز مشرف کی طبیعت اب بہتر ہے۔
پرویز مشرف کی جماعت آل پاکستان مسلم لیگ کے ترجمان کا کہنا ہے کہ سابق صدر دبئی میں اپنی رہائش گاہ پر زیر علاج ہیں۔
ان کا کہنا تھاکہ پرویز مشرف بیماری (امائلائیڈوسس) کیلئے زیر علاج ہیں، انتہائی نازک طبیعت سے متعلق اطلاعات درست نہیں۔خیال رہے کہ سابق صدر طویل عرصے سے دبئی میں مقیم ہیں۔
پاکستان تحریک انصاف کے رہنماءفواد چوہدری نے ٹوئٹ کیا ہے کہ خاندانی ذرائع نے بتایا کہ پرویز مشرف وینٹی لیٹر پر نہیں ہے۔ اپنی بیماری (امائلائیڈوسس) کی پیچیدگی کی وجہ سے پچھلے 3 ہفتوں سے اسپتال میں داخل ہیں۔ ایک مشکل مرحلے سے گزرنا جہاں صحت یابی ممکن نہیں۔
دوسری جانب بھارتی میڈیا سابق صدر جنرل پرویز مشرف کی موت کی جھوٹی خبر شائع کرکے پھر افواہیں پھیلارہا ہے۔ قریبی ذرائع نے تصدیق کی ہے کہ وہ بیمار ہیں لیکن ٹھیک ہیں۔اہل خانہ کا کہنا ہے کہ سوشل میڈیا پر غلط خبریں تصدیق کے بغیر پھیلانے سے گریز کریں۔
