مشال کیس میں سزاؤں کے خلاف احتجاج : رہا ہونے والوں کےلئے ’’ غازی استقبالیہ ‘‘

مردان : مردان میں مختلف مذہبی اور سیاسی جماعتوں نے مشال خان کیس میں سزا یافتہ افراد کی رہائی کا مطالبہ کرتے ہوئے سزا کے خلاف احتجاجی ریلی نکالی اور شدید نعرے بازی بھی کی گئی۔مردان میں پاکستان چوک میں جمعے کی نماز کے بعد شروع ہونے والی احتجاجی ریلی میں، تحفظ ختم نبوت، جماعت اسلامی، جمعیت علما اسلام (ف) کے علاوہ مقامی افراد نے شرکت کی۔احتجاجی ریلی تحفظ ختم نبوت کے امیر قاری اکرام الحق کی سربراہی میں نکالی گئی تھی۔خیال رہے کہ ہری پور کی انسداد دہشت گردی عدالت نے 7 فروری کو عبدالولی خان یونیورسٹی کے طالب علم مشال خان کے قتل کیس کے فیصلے میں ایک مجرم کو سزائے موت، 5 مجرموں کو 25 سال قید اور 25 مجرموں کو 3 سال قید جبکہ 26 افراد کو بری کرنے کا حکم دیا تھا۔مظاہرین نے حکومت اور مشال خان کے خلاف نعرے بازی کی، مظاہرین کی جانب سے تھامے گئے بینرز میں ’مشالیوں روک سکو تو روک لو‘ جیسے نعرے درج تھے۔انسداد دہشت گردی عدالت سے بری ہونے والے افراد کو جلسے کے دوران ’غازی استقبالیہ‘ بھی دیا گیا تھا۔خیال رہے کہ گزشتہ روز بھی مردان میں انسداد دہشت گردی عدالت سے رہائی پانے والے افراد کے استقبال کے لیے جلسہ منعقد کیا گیا تھا۔مشال قتل کیس میں ملوث افراد کے وکیل اور جماعت اسلامی کے رہنماء سید اختر ایڈوکیٹ نے احتجاجی ریلی کے شرکاء سے خطاب کرتے ہوئے کہا کہ ہم مطمئن ہیں کے جو محمد صلی اللہ علیہ وسلم کے شان میں گستاخی کرے گا اور عدالت اسے سزا نہیں دے گی تو ایسے واقعات رونما ہونگے۔ان کا کہنا تھا کہ جو افراد جیل میں ہیں ان کے پیچھے تمام امت مسلمہ کھڑی ہے۔انہوں نے مزید کہا کہ ہم حکومت کو یہ بتانا چاہتے ہیں کہ اگر ان افراد کے خلاف کچھ بھی کیا گیا تو تمام سڑکیں بند کر دینگے۔
( بشکریہ: ڈان اردو )