ماڈل ٹاؤن کیس : ہائی کورٹ کا فیصلہ معطل، دوسری جے آئی ٹی کو کام کرنے کی اجازت

اسلام آباد : سپریم کورٹ نے ماڈل ٹاؤن واقعہ سے متعلق لاہور ہائی کورٹ کے فیصلے کو معطل کرتے ہوئے اس واقعے کی تحقیقات کے لیے صوبائی حکومت کی طرف سے بنائی گئی دوسری مشترکہ تحقیقاتی ٹیم کو کام کرنے کی اجازت دے دی ہے۔لاہور ہائی کورٹ نے گزشتہ برس مشترکہ تحقیقاتی ٹیم کو کام کرنے سے روک دیا تھا۔
سپریم کورٹ کے چیف جسٹس گلزار احمد کی سربراہی میں ایک تین رکنی بینچ نے منگل کے روز لاہور ہائی کورٹ کے حکم امتناعی کے فیصلے کے خلاف اپیل کی سماعت کی۔17 مئی 2014 کو سابق حکمراں جماعت پاکستان مسلم لیگ نواز کے دور میں لاہور کے علاقے ماڈل ٹاون میں واقع ادارے منہاج القران کی عمارت کے باہر مبینہ طور پر پولیس اہلکاروں کی فائرنگ کے نتیجے میں 10 افراد ہلاک اور 66 زخمی ہوئے تھے۔
اس واقعے کا مقدمہ سابق وزیر اعظم میاں نواز شریف اور اس وقت کے وزیر اعلی پنجاب میاں شہباز شریف کے علاوہ اس وقت کے صوبائی وزیر قانون رانا ثنا اللہ سمیت متعدد پولیس اہلکاروں کے خلاف درج کیا گیا تھا۔
جسٹس اعجاز الاحسن نے استفسار کیا کہ پنجاب حکومت نے دوسری جے آئی ٹی بنانے کی ذمہ داری لی تھی تو اس کا کیا بنا؟
جس پر ایڈووکیٹ جنرل پنجاب نے عدالت کو بتایا کہ صوبائی حکومت کی طرف سے تشکیل دی جانے والی نئی جے آئی ٹی 80 فیصد کام مکمل کرچکی تھی کہ اپریل 2019 میں لاہورہائیکورٹ نے نئی جے آئی ٹی کو کام سے روک دیا۔
بینچ میں موجود جسٹس سجاد علی شاہ نے ایڈووکیٹ جنرل پر واضح کیا کہ سابق چیف جسٹس میاں ثاقب نثار کے دور میں جب یہ معاملہ سپریم کورٹ میں آیا تھا تو اس وقت کے پنجاب کے ایڈووکیٹ جنرل احمد اویس نے عدالت عظمی کو یقین دہانی کروائی تھی کہ صوبائی حکومت ماڈل ٹاون واقعے کے بارے میں تحققیات کے لیے ازسرنو مشترکہ تحقیقاتی ٹیم تشکیل دے گی۔
انھوں نے کہا کہ سپریم کورٹ نے نئی جے آئی ٹی بنانے پر کوئی حکم نہیں دیا تھا۔
بینچ کے سربراہ نے پنجاب کے ایڈووکیٹ جنرل سے اس واقعے کی تفصیلات پوچھیں جس پر اس واقعے سے متاثر ہونے والے افراد کے وکیل نے عدالت کو بتایا کہ یہ واقعہ 17 مئی 2014 کو پیش آیا اور اس واقعہ میں 10 افراد ہلاک اور 66 زخمی ہوئے تھے۔
بینچ میں موجود جسٹس سجاد علی شاہ نے استفسارکیا کہ کیا اس مرحلے میں دوسری جے آئی ٹی بنانے میں کوئی قانون رکاوٹ ہے؟
ایڈووکیٹ جنرل پنجاب نے عدالت کو بتایا کہ دوسری جے آئی ٹی بنانے میں کوئی رکاوٹ نہیں ہے جبکہ متاثرین کے وکیل نے سپریم کورٹ کو آگاہ کیا کہ سابق حکمراں جماعت پاکستان مسلم لیگ نواز کے دور میں اس واقعے سے متعلق جو جے آئی ٹی بنائی گئی تھی وہ متنازعہ تھی اور ان کے بقول سابق جے آئی ٹی نے متاثرین سے کوئی پوچھ گچھ نہیں کی تھی۔
جسٹس اعجازالاحسن نے کہا کہ حکومت نئی جے آئی ٹی سے اضافی تحقیقات کروانا چاہتی ہے تو کروا لے۔
سماعت مکمل ہونے کے بعد عدالت نے دوسری جے آئی ٹی کو کام کرنے سے روکنے سے متعلق لاہور ہائی کورٹ کا فیصلہ معطل کردیا۔
چیف جسٹس کا کہنا تھا کہ اس مقدمے کی عدالتی کارروائی بھی دیگر فوجداری مقدمات کی طرح چلائی جائے۔اس درخواست کی سماعت 13 فروری تک ملتوی کردی گئی ۔