اسلام آباد : معروف براڈکاسٹر ثریا شہاب جمعہ کی صبح انتقال کرگئیں، اُنہیں سہ پہرمیں اسلام آباد کے مقامی قبرستان میں سپرد خاک کردیا گیا۔کئی برس تک پی ٹی وی اور بی بی سی سمیت مختلف نشریاتی اداروں سے دنیا بھر کی خبریں سنانے والی ثریاشہاب کے انتقال کی ان کے پرستاروں اور نشریاتی اداروں کو ایک روز بعد خبر ہوئی ۔
اسلام آباد میں مقیم د انشور اور شاعر ڈاکٹرفرحت عباس نے بتایا کہ ان کے جنازے میں بہت کم لوگ شریک ہوئے ۔ اب ان کی یاد میں تعزیتی تقریب کا اہتمام کیا جا رہا ہے ۔ ثریا شہاب کے لواحقین میں دوبیٹے اور ایک بیٹی شامل ہیں۔
ثریا شہاب نے اپنے براڈکاسٹنگ کیریئر کا آغاز ریڈیو تہران کے ایک میگزین پروگرام سے کیا تھا، یہی پروگرام اُن کی کامیابی کا سبب بنا۔ ان کا یہ پروگرام عوام بالخصوص نوجوانوں میں بہت مقبول تھا۔نوجوان اس پروگرام کا بے چینی سے انتظار کیا کرتے تھے۔ اس پروگرام کا آغاز کچھ یوں ہوا کرتا تھا، آواز کی دنیا کے دوستویہ ریڈیو ایران، زاہدان ہے۔بعدازاں ثریا شہاب نے ریڈیو پاکستان اور پاکستان ٹیلی ویژن میں بطور نیوز ریڈر ملازمت کا آغاز کیا، انہوں نے اس شعبے میں بہت اعلیٰ مقام حاصل کیا اور اپنے عہد کی سلیبریٹی بن گئیں۔1980ء کی دہائی کے وسط میں ثریا شہاب نے بی بی سی اردو سروس میں شمولیت اختیار کی اور لندن منتقل ہوگئی تھیں۔