لاہور : پاکستان سپر لیگ(پی ایس ایل) کے ساتویں ایڈیشن کے میچ میں ملتان سلطانز نے کامیابیوں کا سلسلہ جاری رکھتے ہوئے پشاور زلمی کو رنز سے شکست دے کر چھٹی کامیابی حاصل کر لی۔
لاہور کے قذافی اسٹیڈیم میں کھیلے گئے لیگ کے 16ویں میچ میں پشاور زلمی نے ملتان کے خلاف ٹاس جیت کر پہلے باؤلنگ کا فیصلہ کیا۔ملتان سلطانز کے اوپنرز شان مسعود اور محمد رضوان نے ایک مرتبہ پھر اپنی ٹیم کو عمدہ آغاز فراہم کیا اور 98 رنز کی شراکت قائم کی۔
شان نے بہترین فارم برقرار رکھتے ہوئے نصف سنچری اسکور کی البتہ دوسرے اینڈ سے محمد رضوان مستقل جدوجہد کرتے نظر آئے۔ان کی 34 گیندوں پر 34 رنز کی اننگز وہاب ریاض کے ہاتھوں اختتام کو پہنچی۔شان نے نئے بلے باز ٹم ڈیوڈ کے ساتھ مل کر اسکور کو 131 تک پہنچایا اور اسی مرحلے پر 49 گیندوں پر 68 رنز بنانے کے بعد سلمان ارشاد کو وکٹ دے بیٹھے۔
ٹم ڈیوڈ نے ایک مرتبہ پھر جارحانہ بیٹنگ کا مظاہرہ کرتے ہوئے 18 گیندوں پر 3 چھکوں اور دو چوکوں کی مدد سے 34رنز بنائے جبکہ رائلی روسو 15رنز بنا سکے۔سلطانز نے مقررہ اوورز میں 7 وکٹوں کے نقصان پر 182رنز بنائے۔پشاور زلمی کی جانب سے ثاقب محمود، وہاب ریاض اور سلمان ارشاد نے دو، دو وکٹیں حاصل کیں۔
ہدف کے تعاقب میں زلمی کی اننگز کا آغاز اچھا نہ تھا اور کامران اکمل صرف چار رنز بنانے کے بعد بولڈ ہو گئے۔ابھی زلمی اس نقصان سے سنبھلی بھی نہ تھی کہ مزربانی نے اپنی ٹیم کو دوسری کامیابی دلاتے ہوئے حیدر علی کو بھی چلتا کردیا۔پانچ رنز پر دو وکٹیں گرنے کے بعد لیام لیونگسٹن کا ساتھ دینے شعیب ملک آئے اور دونوں نے اسکور کو آگے بڑھانا شروع کیا۔
لیونگسٹن اور شعیب ملک دونوں کو اس اننگز کے دوران ایک، ایک موقع ملا جب سلطانز کے فیلڈر ان کے آسان کیچ تھام نہ سکے۔اسکور 42تک پہنچا ہی تھا کہ لیونگسٹن کی 16 گیندوں پر 24رنز کی اننگز اختتام کو پہنچی جبکہ حسین طلعت بھی صرف چار رنز بنا سکے۔
شعیب ملک نے شرفین ردرفورڈ کے ساتھ مل کر 40 رنز جوڑے اور اسکور کو 91 تک پہنچایا لیکن اسی اسکور پر مزربانی نے تیسری وکٹ لیتے ہوئے ویسٹ انڈین بلے باز کو چلتا کردیا۔میچ میں کامیابی کی زلمی کی آخری امید اس وقت دم توڑ گئی جب شعیب ملک 44 رنز بنانے کے بعد عمران طاہر کی وکٹ بن گئے۔
اس کے بعد بین کٹنگ نے چند بڑے شاٹس ضرور لگائے اور 11 گیندوں پر 23 رنز بنائے لیکن ان کی یہ کاوش بھی زلمی کے کسی کام نہ آئی۔پشاور زلمی کی پوری ٹیم اننگز کے آخری اوور میں 140رنز بنا کر آؤٹ ہو گئی اور سلطانز نے میچ میں 42رنز سے کامیابی حاصل کر لی۔
سلطانز کی جانب سے زمبابوین فاسٹ باؤلر بلیسنگ مزربانی نے عمدہ باؤلنگ کرتے ہوئے 18رنز کے عوض تین وکٹیں لیں جبکہ شاہنواز دھانی نے 2 وکٹیں حاصل کیں۔
دونوں ٹیموں کے درمیان رواں سال کھیلے گئے پہلے میچ میں ملتان سلطانز نے پشاور زلمی کو 57 رنز سے شکست دے دی تھی۔
( بشکریہ : ڈان نیوز )
