ملتان۔30مئی (اے پی پی):ملتان اورگردونواح میں دوروز قبل آنے والے طوفان بادوباراں کے نتیجے میں آموں کے باغات کو بڑے پیمانے پرنقصان پہنچا،کئی تناوردرخت گرگئے اور کچے آم جھڑگئے۔
نواز شریف زرعی یونیورسٹی سےتعلق رکھنے والے نامور ماہر زراعت پروفیسرڈاکٹرعابدحسین نے اے پی پی سے بات چیت کرتے ہوئے کہاکہ طوفان بادوباراں نے لیٹ ورائٹی کو سب سے زیادہ نقصان پہنچایا،ابتدائی تخمینے کے مطابق آموں کے باغات کو20سے 30فیصدنقصان پہنچا۔انہوں نے کہاکہ آئندہ دوسے تین روزمیں ہمارے پاس مکمل اعدادوشمار بھی آجائیں گے جس کے بعد میں اس پرتفصیلی رائے دے سکوں گا۔
انہوں نے مزیدکہاکہ جمعرات تک بارشوں کاسلسلہ جاری رہنے کاامکان ہے اگراس دوران مزید آندھی نہ آئی توصورتحال مزید خراب نہیں ہوگی ۔
