لاہور : جماعت اسلامی پاکستان کے جنرل سیکریٹری امیر العظیم انتقال کرگئے۔
ترجمان جماعت اسلامی نے امیر العظیم کے انتقال کی تصدیق کرتے ہوئے بتایا کہ امیر العظیم طویل عرصے سے علیل اور کینسر کے مرض میں مبتلا تھے، وہ طویل عرصہ جماعت اسلامی پاکستان کے مرکزی سیکریٹری اطلاعات بھی رہے۔
ترجمان جماعت اسلامی کے مطابق امیر العظیم کی نماز جنازہ کا اعلان بعد میں کیا جائے گا۔
رہنما جماعت اسلامی امیر العظیم 1958ء میں لاہور میں پیدا ہوئے۔ انھوں نے اسلامیہ اسکول سنت نگر سے میٹرک اور اسلامیہ کالج ریلوے روڈ سے ایف ایس سی کا امتحان پاس کیا، جبکہ اسلامیہ کالج سول لائنز سے فزکس ڈبل میتھ کے ساتھ بی ایس سی، اور پنجاب یونیورسٹی سے ایم بی اے کی ڈگری حاصل کی۔
امیرالعظیم اسکول کے زمانہ سے اسلامی جمعیت طلبہ کے ساتھ وابستہ ہو گئے تھے۔ پنجاب یونیورسٹی طلباء یونین کے منتخب صدر رہے، بعدازاں اسلامی جمعیت طلبہ کے ناظم اعلیٰ کے طور پر فرائض سر انجام دیے۔
زمانہ طالب علمی میں امیر العظیم نے ضیاء الحق دور میں طلبہ یونین کی بحالی کے لیے لانگ مارچ کیا، اور اس کے لیے جیل کی سزا بھی کاٹی، اسی قید کے دوران اسلامی جمعیت طلبہ کے ناظم اعلیٰ کے طور پر انھیں منتخب کیا گیا تھا۔
وہ ایک طویل عرصہ جماعت اسلامی پاکستان کے مرکزی سیکرٹری اطلاعات رہے۔ اس کے بعد جماعت اسلامی لاہور کے سیکریٹری جنرل اور امیر بھی رہے، 2019ء میں اپنے دوسرے انتخاب کے بعد سراج الحق نے مرکزی مجلس شوریٰ کے مشورے سے امیرالعظیم کو جماعت اسلامی پاکستان کا مرکزی سیکریٹری جنرل مقرر کیا۔
( بشکریہ : جیو نیوز )
فیس بک کمینٹ