آسٹریلیا ٹیسٹ ٹیم کے موجودہ کپتان ٹم پین ایک خبر سے بری طرح متاثر تھے کہ دوسرے واقعہ نے ان کی بوکھلاہٹ مزید نمایاں کردی چنانچہ پریشانی میں وہ اپنی ہی بات سے پھر گئے .
پہلے تازہ واقعہ کا ذکر ہو جائے.
کورونا لاک ڈاؤن کی وجہ سے ان کے ہاں چوری ہوگئی. ہوبارٹ میں اپنی رہائش گاہ کے گیراج کو انہوں نے جم میں تبدیل کردیا ہے. ضروری ایکسر سائز کی وجہ سے خاصا سامان ہونے کے باعث اپنی گاڑی انہیں گھر کے باہر پارک کرنی پڑ رہی ہے.
منگل کی صبح انہیں ان کے بینک سے کال آئی کہ ان کا کریڈٹ کارڈ استعمال کرنے کی کوشش کی گئی ہے. ٹم پین کو ادراک ہوا کہ انکا پرس تو باہر موجود گاڑی میں ہے.
چنانچہ آسٹریلوی کپتان تیز رن لینے کی طرح دوڑتے باہر نکلے تو اس وقت تک ان کی گاڑی کی بیلز اڑ چکی تھیں اور جس طرح وکٹیں آؤٹ ہونے پر دائیں بائیں ہوتی ہیں ایسے ہی گاڑی کا دروازہ بھی کھلا ہوا تھا .چیک کرنے پر ان کا پرس اور ضروری سامان غائب تھا.
پین کیلئے یہ واقعہ اگرچہ زیادہ "پین فل”نہیں تھا لیکن چور کو کیا پتہ
کہ پین تو پہلے ہی "پین” میں تھے.
میڈیا پر سامنے آئے تو یہ بات کہیں پیچھے رہ گئی،
ان سے تو سوال یہ تھا کہ
اسٹیون اسمتھ کپتانی کیلئے اہل ہوگئے تو اب کیا ہوگا.
ٹم پین نے پہلا جواب وہی دیا جو اس موقع پر عام ہوتا ہے
"سمتھ قابل کپتان ہیں. مجھے ان کی ریڈار میں واپسی پر خوشی ہوئی. میں ان کی سپورٹ کروں گا.وہ جب چاہیں کپتانی سنبھال سکتے ہیں "-
گھر میں چند گھنٹے گزارنے کے بعد شاید انہیں پرس کی چوری کی طرح کپتانی بھی چوری ہوتے محسوس ہوئی.
چنانچہ چند گھنٹے بعد انہوں نے یہ بیان جاری کرکے اپنی پوزیشن بچانے کی کوشش کی کہ
"میں نے سمتھ کے حق میں بیان اگلے آسٹریلوی کپتان کی حیثیت سے دیا ہے. کرکٹ آسٹریلیا کا یہ دستور رہا ہے کہ وہ پائپ لائن میں کئی کپتان تیار رکھتا ہے. اس وقت پیٹ کمنز اور لبوشین بھی ہیں. انہیں پیچھے رکھ کر تیاری کرنا اور سمتھ کو اگلا کپتان بنانا بہتر ہوگا میں اس کی سپورٹ کروں گا. ”
ساتھ ہی ٹم پین نے اپنا "پین”کچھ کم کرتے ہوئے سمتھ اور کرکٹ آسٹریلیا پر واضح کیا کہ
"میں اگلے سال ورلڈ ٹیسٹ چیمپئن شپ کے فائنل تک کھیلوں گا.اگلی ایشز 2022-21 کی کپتانی میں نہیں کروں گا. ”
ٹم پین کی ذہنی حالت کا اندازا کیا جاسکتا ہے کیونکہ کورونا وائرس کی وجہ سے کرکٹ سرگرمیاں معطل ہیں اور ورلڈ ٹیسٹ چیمپئن شپ کے مستقبل کا فی الحال کچھ پتا نہیں. ٹم پین پرس کی چوری سے زیادہ کپتانی کی چوری کے خوف میں پین کا شکار ہیں.
