اسلام آباد : عمران خان توشہ خانہ کیس میں 17 برس کی سزا کا سن کر مسکرا دیے ۔۔۔ بی بی سی کے مطابق ایک جیل اہلکار نے بتایا کہ جب جج فیصلہ سنا رہے تھے تو اس وقت عمران خان اپنی اہلیہ سمیت عدالت میں موجود تھے۔ جیل اہلکار کے مطابق جج نے تین بار عمران خان کو ڈائس پر آنے کو کہا مگر سابق وزیر اعظم نے ڈائس پر آنے سے انکار کر دیا۔
جیل اہلکار کے مطابق جب جج فیصلہ سنا رہے تھے تو عمران خان بشری بی بی سے گفتگو کر رہے تھے۔ اہلکار کے مطابق جج جب فیصلہ سنا کر چلے گئے تو عمران خان نے پوچھا کہ کیا فیصلہ سنایا گیا، جب عمران خان کو 17 برس کی سزا کا بتایا تو وہ یہ سن کر مسکرا دیے۔
جیل میں موجود صحافیوں سے عمران خان نے کوئی گفتگو نہیں کی۔ جیل اہلکار کے مطابق جیل کے اندر کمرہ عدالت میں پراسکیوٹر ذوالفقار نقوی کے علاوہ عمران خان کے ایک وکیل ارشد تبریز بھی موجود تھے۔
عمران خان کے وکیل سلمان صفدر نے بی بی سی کے نمائدہ عثمان زاہد سے گفتگو میں بتایا کہ عمران خان خیریت سے ہیں اور انھوں نے ملاقات کے دوران اپنی صحت سے متعلق کسی تشویش کا اظہار نہیں۔
سلمان صفدر کے مطابق جب عدالت نے عمران خان اور ان کی اہلیہ بشریٰ بی بی کو سزا سنائی تو عمران خان کا ایک وکیل جیل کے اندر موجود تھا تاہم عمران خان کی بہنوں اور صحافیوں کو جیل کے احاطے میں جانے کی اجازت نہیں دی گئی۔
( بشکریہ : بی بی سی )
